Edlira Shehu, ish-sekretarja gjyqesore e Gjykatës Administrative Vlorë e akuzuar për ndryshim të vendimeve gjyqësore, u la nga gjykata me masë sigurie në burg. Shehu pranoi tjetërsimi e një vendimi, por tha se e kishte bërë nën presion.
Edlira Shehu, ish-sekretarja gjyqesore, mbi të cilën rëndojnë akuzat “Shpërdorimit të detyrës dhe Humbje apo tjetërsim i fashikullit gjyqësor” u la me masë sigurie burg nga Gjykata e Vlorës ditën e shtunë.
Me kërkesë të prokurorisë gjyqtarja Mirela Mishgjoni vlerësoi të ligjshëm ndalimin e ish-sekretares së Gjykatës Administrative të Vlorës, ndërsa rrëzoi kërkesën e mbrojtjes për një masë më të lehtë për shkak të rrethanave familjare të së akuzuarës.
Prokuroria akuzon Shehun, e cila u arrestua pak ditë më parë, për tjetërsimin e disa vendimeve të Gjykatës Administrative Vlorë, ndërsa paraqiti në gjykatë 800 faqe material. Vetë Shehu ka pranuar ndryshimin e një vendimi gjyqësorë, por ka pretenduar se këtë e ka bërë në kushte të presionit të vazhdueshëm. Nuk është e qartë se kush ka ushtruar presion dhe as nëse e arrestuara ka dëshmuar mbi këtë rast.
Edlira Shehu u arrestua pasi kishte dhënë dorëheqjen. Veprimet e saj u zbuluan pas një ankimi në zyrën e gjyqtares Gentjana Xhelili, për të cilën ajo punonte. Gjyqtarja pas këtij ankimi ka konstatuar mungesën e vendimit dhe fashikullit në të cilin ishte bërë arsyetimi.
Gjatë hetimit prokuroria ka bërë ballafaqimin e audios së seancës me vendimin e shkruar të cilët nuk përputhen me njëri – tjetrin. Ndërkohë pas një kontrolli në banesën e Shehut
janë gjetur edhe një sërë dosjesh të tjera për të cilat prokuroria ka ngritur pretendimet se mund të kenë qenë objekt tjetërsim, por ende nuk i janë nënshtruar ekspertizës.
E pyetur nga BIRN gjyqtarja Gentjana Xhelili tha se ka dëshmuar në prokurori dhe polici. Sipas saj është e rëndësishme të pritet përfundimi i hetimit.
Shehu përfaqësohej nga Av. Edmond Dëma, i cili pas seancës për masë sigurie tha se pretendimet e prokurorisë bazoheshin kryesisht në dyshime. Ai megjithatë tha se ende nuk është njohur thellësisht me çështjen, e cila ishte voluminoze. Në seancë ai kërkoi një masë më të butë sigurie duke marr parasysh kushtet familjare dhe shëndetësore në të cilat Shehu gjendet. Ai tha se ajo ishte nënë e vetme dhe kujdesej për të ëmën e sëmurë dhe të birin 13-vjeç. Dëma tha se do e apelonte masën e sigurisë.
