Në një deklaratë të publikuar të Enjten, një nga organizatat më të rëndësishme në botë për mbrojtjen e gazetarëve, i kërkoi Metës të kthejë ligjin si dhe kërkoi rrëzimin e tij duke e konsideruar atë “një goditje e stëmadhe për lirinë e shprejtës”.
Komiteti për Mbrojtjen e Gazetarëve, CPJ, një nga organizatat më të rëndësishme në botë për lirinë e fjalës, e njohur në Shqipëri mes të tjerash për shpalljen e ish-presidentit Sali Berisa si një nga dhjetë armiqtë më të mëdhenj të gazetarëve në botë në vitin 1997, i kërkoi presidentit Ilir Meta të enjten të kthejë projektligjet e Ramës për median duke i konsideruar ato një “goditje gjigande për lirinë e shprehjes.”
Në një deklaratë për shtyp, organizata me bazë në Nju Jork, e cila është themeluar në vitin 1981, i hodhi poshtë ligjet në tërësi dhe mbështeti organizatat shqiptare të të drejtave të njeriut.
“Presidenti i Shqipërisë Ilir Meta duhet të hedhë poshtë legjislacionin e propozuar që mund t ëkufizojë faqet e internetit dhe të mbysë shtypin e lirë,” tha komiteti.
“Ligji i kërkon faqeve të internetit të regjistrohen në një organ të qeverisë dhe mund të fuqizojë rregullatorin e medias së vendit që të dëgjojë ankesa mbi faqet e lajmeve, të kërkojë tërheqje të lajmeve, të imponojë gjovba deri në 1 milionë lekë, të bllokojë faqet e internetit të huaja,” vëren CPJ.
“Presidenti i Shqipërisë Ilir Meta duhet t’i shohë ligjet e propozuara të medias për ato që ata janë: një goditje e stëmadhe për lirinë e medias,” deklaroi koordinatorja e CPJ-së për Programin e Europës dhe Azisë Qendrore në Nju Jork. “Meda duhet t’i hedhë poshtë këto propozime dhe të sigurohet që çdo ligj mediaje në të ardhmen i propozuar nga qeveria të marrë parasysh shqetësimet dhe rekomandimet e grupimeve vendëse përfaqësuese të gazetarëve dhe të të drejtave të njeriut,” shtoi ajo.
CPJ citoi deklaratën e 16 organizatave shqiptare të të drejtave të njeriut, të cilat e kanë dënuar ligjin në mënyrë të përsëritur si jo në përputhje me standardet ndërkombëtare të të drejtave të njeriut.
Projektligjet u miratuan nga deputetët socialistë të Mërkurën mes debateve të ashpra. Rama, i cili foli mbi një orë për të mbrojtur idenë e tij për projektligjet, sulmoi organizatat kritike si organizata false ndërsa sugjeroi se Komisioni Europian dhe Këshilli i Europës, dy institucione që kanë kërkuar tërheqjen e ligjeve, janë gënjyer nga organizatat protestuese.
Një ditë pas miratimit të ligjeve, presioni ndaj qeverisë duket se është në rritje.
David Lega, një deputet i parlamentit Europian nga Suedia, i cili është edhe reporter për Shqipërinë në Parlamentin Europian për Partinë Popullore Europiane, publikoi një deklaratë në të cilën kërkoi në mënyrë eksplicite tërheqjen e projektligjeve duke kërcënuar me pasoja në rrugëtimin e Shqipërisë drejt Bashkimit Europian.
“Ne vërejmë me shqetësim të madh se shumica parlamentare e qeverisë shqiptare udhëhequr nga kryeministri socialist Edi Rama i miratoi dy ligjet e medias dje, në kundërshti të ahpur me rekomandimet specifike të bashkësisë ndërkombëtare,” shkruhet në deklaratë.
“Miratimi për rrjedhojë duhet të shihet si një hap serioz pas për Shqipërinë në rrugën drejt shtetit të së drejtës dhe demokracisë…. Ne nxisim autoritetet shqiptare të rivlerësojnë vendimin dhe ta përmbysin atë.”
