Kandidati i qendrës së majtë, Zoran Milanoviç siguroi një fitore vendimtare të dielën, duke i mohuar një mandat të dytë presidentes Kalinda Grabar – Kitaroviç.
Sipas rezultateve paraprake, Zoran Milanoviç fitoi raundin e dytë të zgjedhjeve presidenciale në Kroaci të dielën, pasi u llogaritën gati 100 përqind të votave.
Kandidati socialdemokrat, njëkohësisht ish-kryeministër mori 52.70 përqind të votave, duke mposhtur me lehtësi rivalin e tij të qendrës së djathtë, presidenten aktuale Kolinda Grabar-Kitaroviç, e cila fitoi 47.30 përqind të votave.
“Faleminderit të gjithëve që më mbështetën dhe atyre që nuk më mbështetën,” tha Milanoviç në selinë e tij të zgjedhjeve, duke festuar fitoren.
“Unë e di se ka nga ata që nuk më pëlqejnë, por ne duhet të vazhdojmë të jetojmë me ata … Ju nuk do të dëgjoni histori të lumtura nga unë për unitetin, por unë do të bëj çmos që të mos lëndoj askënd në mënyrë të panevojshme ose me qëllim,” vazhdoi ai .
Në një fjalim emocional, Grabar-Kitarovic falënderoi votuesit e saj dhe uroi Milanoviç për fitoren e tij.
“Për disa, uniteti është ndoshta një fjalë e guximshme. Nuk është për mua, ” tha ajo. “I uroj suksese Milanoviçit, është në interes të fëmijëve tanë.”
Milanoviç u bë kryeministër në vitin 2011. Por qeveria e tij u pengua nga një recesion ekonomik, nga i cili Kroacia filloi të dalë vetëm në vitin 2015. Në zgjedhjet e nëntorit 2015, koalicioni i udhëhequr nga socialdemokrati fitoi 56 nga 151 vendet në parlament, ndërsa koalicioni i qendrës së djathtë i udhëhequr nga Bashkimi Demokratik Kroat, HDZ, mori 59 deputet. Qeveria e re u krijua nga HDZ dhe parti më të vogla.
Ish-ministre e Jashtme, ambasadore në Shtetet e Bashkuara dhe Ndihmës Sekretare e Përgjithshme për Diplomacinë Publike në NATO, Grabar-Kitaroviç fitoi zgjedhjet presidenciale në janar 2015, duke mposhtur ngushtësisht ish-presidentin e qendrës së majtë, Ivo Josipovic. Diferenca midis tyre ishte vetëm 32.435 vota.
Milanoviç kryesoi në raundin e parë, më 22 dhjetor, duke fituar 29.55 përqind të votave të hedhura. Grabar-Kitaroviç u rendit i dyti me 26.65 përqind. Miroslav Skoro, një këngëtar popullor i krahut të djathtë dhe ish-deputet, u rendit i treti me 24.43 përqind.
Rezultati do të jetë një zhgënjim për qeverinë e udhëhequr nga HDZ nën Andrej Plenkovic, e cila kishte mbështetur Grabar-Kitaroviç.
Një total prej 3.860.087 njerëz kishin të drejtë të votonin të dielën, nga të cilat 3,681,139 kanë vendbanim në Kroaci. Jashtë vendit, 178.948 njerëz të tjerë mund të votonin. Shumica e tyre, ose 92.663, janë regjistruar në Bosnjë dhe Hercegovinën fqinje, ku kroatët janë grupi i tretë më i madh etnik.
Sipas Komisionit Shtetëror Zgjedhor, pjesëmarrja e votuesve nga mesi i pasdites ishte rreth 43.52 përcqind. Në krahasim, pjesëmarrja në këtë kohë në raundin e parë të votimit ishte 38.82 përqind.