Eno Bozdo ka qenë zëri i vetëm politik që reagoi të dielën për protestën e minatorëve ndaj pronarit të kompanisë Albrchrome, Samir Mane, por edhe sekretari organizativ i PD-së nuk guxoi ta përmendte njeriun më të pasur në Shqipëri.
Sekretari i Organizativ i Partisë Demokratike, Eno Bozdo deklaroi të dielën nëpërmjet një postimi në Facebook se qeveria aktuale nuk ka denjuar të dëgjojë apo të marrë në konsideratë kërkesat dhe problemet aktuale të minatorëve, të cilët tashmë prej muajsh vijojnë me protestat e tyre.
“Protestat vazhdojnë prej muajsh, por Edi Rama dhe qeveria e tij ka zgjedhur t`i injorojë minatorët plotësisht,” shkruan Bozdo, pa e përmendur kompaninë Albchrome dhe pronarin e saj Samir Mane.
“Ndjeshmëria e tij për Bulqizën, minatorët edhe dhe qytetarët e saj, është shumë e qartë kur kërkon tu emërojë me dhunë si kryetar bashkie një konsumator ordiner të kokainës,” shtoi Bozdo.
Të dielën Sindikata e Minatorëve të Bashkuar të Bulqizës dhe aktivistë të shoqërisë civile organizuan një tubim në Tiranë, duke e akuzuar kompaninë Albchrome për shkarkime të padrejta nga puna të anëtarëve të sindikatës.
Protesta e së dielës ndjek tubime të ngjashme në Bulqizë nga sindikalistët dhe aksione propagandistike në Tiranë nga aktivistët e Organizatës Politike kundër Samir Manes dhe kompanisë Albchrome.
Nëpërmjet një njoftimi me shkrim të dielën, grupi Balfin – kompania mëmë e Albchrome, i tha BIRN se anëtarët e SMBB-së duhet të ndiqnin hapat ligjorë për të hyrë në negociata me kompaninë.
“Çdo sindikatë e re që krijohet duhet të ndjekë hapat ligjorë për të hyrë në bisedime, me çdo kompani në Shqipëri, përfshire edhe ne, sipas dispozitave të Kodit të Punës, që rregullon veprimtarinë sindikale,” tha kompania.
“Çdo veprim sindikal, që bie ndesh me dispozitat e Kodit të Punës, pavarësisht formës dhe numrit të personave të përfshirë përbën veprimtari të paligjshme,” shtoi kompania minerare.
Minatorët dhe aktivistët protestuan të dielën përpara Kryeministrisë, Ministrisë së Financave, Inspektoriatit të Punës, dhe pranë banesës së Samir Manes, duke e akuzuar këtë të fundit se në mënyrë të paligjshme po mundohet të mbysë lëvizjen sindikale.
Bozdo u shpreh se qeveria aktuale mbyll sytë ndaj këtyre padrejtësive dhe se aktualisht nëpërmjet Këshillit Kombëtar të Punës dhe Inspektoriatit të Punës kjo qeveri ka tashmë përgjegjësinë direkte të trajtojë me shumë seriozitet gjendjen e vështirë të minatorëve në Bulqizë e kudo, dhe të ofrojnë një zgjidhje të arsyeshme për kërkesat e tyre.
Sipas tij kjo qeveri tashmë prej muajsh nuk ka në interes të saj të mbështesë këtë kauzë, por aleancat e saj janë në një vijë me krimin dhe oligarkinë, dhe jo me minatorët dhe qytetarët e Bulqizës.
“Nëse Bulqiza do të kishte mundësi të zgjidhte, sot në krye të saj do të ishte një kryebashkiak që do të solidarizohej me minatorët dhe do të luftonte për kauzën e drejtë të tyre,” tha ai. “Kryeministri dhe qeveria e tij kanë braktisur prej kohësh minatorët dhe Bulqizën,” përfundoi Bozdo.