Dhjetëra të dyshuar janë vënë në pranga si pjesë e një hetimi për një seri veprash penale, përfshirë drogë, falsifikime e ndikim tek funksionarët publikë – mes të ndaluarve janë botuesi Henri Çili dhe biznesmeni Seit Fishta.
Policia e Shtetit njoftoi të premten realizimin e një operacioni të shtrirë në disa qarqe të vendit që ka çuar në pranga 35 persona – mes tyre botuesin dhe gazetarin Henri Çili dh biznesmenin Seit Fishta.
Të dyshuari përfshihen për një listë të gjatë veprash penale, përfshirë “prodhim dhe shitja e narkotikëve”; “ushtrimi i ndikimit të paligjshëm ndaj personave që ushtrojnë funksione publike”; “falsifikimi i kartëmonedhave”, “mbajtja pa leje e armëve të zjarrit dhe lëndëve plasëse”, “organizimi i lotarive të palejuara”, “pastrimi i produkteve të veprës penale”, “fshehja e të ardhurave”, “mashtrimi” dhe “falsifikimi i dokumenteve”.
Sipas njoftimit të policisë janë arrestuar 35 persona në Tiranë, Përmet, Tepelenë, Shkodër, Ballsh, Patos, Krujë, Fushë-Krujë e Lazarat; janë shpallur në kërkim 6 persona të tjerë dhe 12 ndiqen në gjendje të lirë për vepra të ndryshme penale që kanë lidhje me këtë procedim të nisur gjashtë muaj më parë nga prokuroria e Përmetit për “falsifikim të kartëmonedhave”.
Një prokuror që ka dijeni për hetimin i cili nuk preferoi të identifikohej i tha BIRN se, gjashtë muaj më parë kishte nisur hetimi për disa shpërndarës të lëndëve narkotike në qytetin e Përmetit, por më pas hetimi ishte zgjeruar duke identifikuar persona që shisnin sasi më të mëdha lëndësh narkotike e deri tek të tjerë që kryenin falsifikime të dokumenteve e premtonin të ndikonin tek persona që ushtrojnë funksione publike në këmbim të përfitimeve.
Në njoftimin e policisë thuhet se botuesi dhe gazetari Henri Çili është i dyshuar për veprat penale “fshehja e të ardhurave”, “pastrimi i produkteve të veprës penale ose veprimtarisë kriminale”, “falsifikimi i dokumenteve”, “mashtrimi”, “ushtrimi i ndikimit të paligjshëm ndaj personave që ushtrojnë funksione publike” dhe “falsifikimi dokumenteve” në bashkëpunim.
Ndërsa biznesmeni Seit Fishta është proceduar për veprat penale “fshehja e të ardhurave”, “pastrimi i produkteve të veprës penale ose veprimtarisë kriminale”, “falsifikimi i dokumenteve” dhe “mashtrimi”.
Sipas policisë, në katër episode të ndryshme kohore gjatë hetimit të kryer ndaj 53 personave, 35 prej të cilëve janë ndaluar, janë sekuestruar 128 kg lëndë narkotike ‘cannabis sativa’, droga të forta në formë dozash heroine dhe kokaine, 2 kallëpe lëndë plasëse tritol, shuma parash në vlerën 10 milion lekës, 7500 euro, 3500 euro të tjera të dyshuara si të falsifikuara, 7 automjete, dokumente të dyshuara të falsifikuara dhe kontrata noteriale të ndryshme.
Më tej në njoftim thuhet se në kuadër të operacionit të emërtuar “Mezhgorani” janë kontrolluar 61 banesa, 10 ambienteve njësi shërbimi e 33 automjete, prej nga janë gjetur e sekuestruar: 3 pushkë automatike me silenciator, 2 automatikë kallashnikovë, 8 kallëpe lënde plasëse tritol, 620 fishekë, 2 granata difensive, 71 krehër fishekësh, 13 automjete të markave të ndryshme, 40 telefona celularë, dokumente noteriale, kontrata, certifikata pronësie të ndryshme dhe një sasi lënde narkotike cannabis sativa.
Policia bënë me dije se për realizimin e ekzekutimit të urdhër-ndalimeve dhe kontrolleve janë angazhuar 15 grupe të reparteve të FNSH dhe reparte të tjera në Shkodër, Fier, Tiranë, Gjirokastër, Durrës dhe Elbasan. Në njoftim thuhet se operacioni është ende në vijim.
