Konfirmohen në entitetin serb të Bosnjës dy rastet e para me koronavirusin COVID-19, një burrë që punonte në Itali dhe fëmija i tij.
Ministri i shëndetësisë në Republikën Srpska, entiteti me shumicë serbe i Bosnjës dhe Hercegovinës, ka konfirmuar dy rastet e para të koronavirusit në vend. I pari është një person që punon në Itali dhe tjetri është fëmija i tij. Të dy rezultuan pozitivë për virusin Covid-19, tha ministri i shëndetësisë i Republikës Srpska, Alen Seraniç, të enjten në Banja Luka.
Ministri tha se burri ishte shtruar në spital në Klinikën Universitare në Banja Luka pasi u paraqit vetë në spital me simptoma të sëmundjes. Ministri i kërkoi publikut të qëndrojë e qetë dhe të shmangë panikun.
Aktualisht, nuk është raportuar asnjë rast në entitetin tjetër të vendin, Federata e Bosnjës dhe Hercegovinës.
Seraniç tha se ai priste raste të tjerë, duke qenë se shumë boshnjakë punojnë në Itali, i cili është një nga vendet më të prekura në botë, së bashku me Kinën, Korenë e Jugut dhe Iranin.
Sipas tij, autoritetet kontaktuan shkollën të cilën frekuenton fëmija i sëmurës në përpjekje për të identifikojnë raste të reja të mundshme. Shkolla është mbyllur përkohësisht. Bashkëshortja e pacientit ka rezultuar negative për këtë virus.
Bosnja nuk i kontrollon personat që kalojnë kufirin për simptomat Covid-19. Megjithatë, policia kufitare është udhëzuar të grumbullojë informacione nga njerëz që vijnë nga Kina, Koreja e Jugut, Irani dhe Italia. Policia gjithashtu këshillon personat që vijnë nga këto vende për hapat që duhet të ndërmarrin nëse ata shfaqin ndonjë simptomë të lidhur me Covid-19.
Në Sarajevë autoritetet lokale të mërkurën lëshuan rekomandime më të rrepta për grupet e cenueshme, me shpresën për të parandaluar ndonjë shpërthim të mundshëm të koronavirusit.
Shkollat u këshilluan të anulojnë ekskursionet në vende dhe rajone me raste të raportuara. Autoritetet gjithashtu këshilluan ndalimin e vizitave nëpër azilet e të moshuarve për të minimizuar rreziqet shëndetësore për atë pjesë të popullatës.
Deri më tani, Ballkani në përgjithësi ka qenë i paprekur nga shpërthimi i virusit. Deri të enjten, në të gjithë botën ishin raportuar mbi 95,000 raste. Por shumica e tyre janë në Kinë – rreth 80,000 – e ndjekur nga Koreja e Jugut, Irani dhe Italia. Në shumicën e vendeve të tjera janë raportuar vetëm disa raste. Në Ballkan janë konfirmuar raste koronavirusi në Kroaci, Maqedoninë e Veriut dhe në Rumani.
