Serbia ka raportuar rastin e saj të parë me koronavirus, një burrë i cili u paraqit vetë në spital në Subotica pas simptomave të para. Personi në fjalë tashmë është vendosur në karantinë atje.
Ndërsa numri i rasteve me koronavirus rritet në të gjithë Europën, Serbia ka konfirmuar rastin e saj të parë, një 43-vjeçar i cili ka qenë shpesh në Hungari.
Ministri i shëndetësisë Zlatibor Loncar tha se burri aktualisht ishte në karantinë në spitalin në Subotica, afër kufirit hungarez, ku ai ishte paraqitur pasi nuk ishte ndjerë mirë. Gjendja e tij nuk shihet si alarmante.
“Rezultatet e analizave dolën para një orë dhe ai është në Subotica në karantinë. Kampionë iu morën edhe të gjithë personave me të cilët ai kishte pasur kontakt”, tha Loncar në një konferencë për shtyp të premten.
Predrag Kon, kreu i Njësisë së Sëmundjeve Infektive të Institutit të Shëndetit Publik në Beograd, tha se ishte mirë që pacienti ishte vetë izoluar, por ai priste që të shfaqeshin raste të tjera dhe se sistemi shëndetësor do të ishte nën presion.
“Mund të pritet që të shfaqen raste të tjera, sidomos në kryeqytet. Mesazhi është: “Ne vazhdojmë jetën tonë si më parë. Nuk ka asnjë ndryshim dhe disa pjesë të sistemit të kujdesit shëndetësor do të rëndohen shumë thjesht sepse është e nevojshme që të gjurmohen të gjitha këto kontakte. Në këtë rast, për fat të mirë, për shkak të izolimit të tij, nuk kemi një numër të madh rastesh”, tha Kon.
Në rajon, Kroacia konfirmoi rastin e 11-të të koronavirusit të premten. Bosnja dhe Hercegovina të enjten konfirmoi dy raste në Republikën Srpska. Maqedonia e Veriut ka konfirmuar një rast, një grua e cila që atëherë është shëruar.
Nuk ka raste të konfirmuara në Mal të Zi, edhe pse 34 persona janë nën mbikëqyrje dhe autoritetet atje kanë pezulluar fluturimet drejt Bolonjës dhe Milanos për shkak të përhapjes së virusit në veri të Italisë. Rumania ka raportuar shtatë raste të konfirmuara, tre prej tyre tashmë të shëruar.
Në të gjithë botën, janë raportuar mbi 95,000 raste, rreth 80,000 prej tyre janë në Kinë. Shumica e të tjerëve janë në Korenë e Jugut, Iran dhe Itali. Shifrat në vende të tjera janë më të ulëta, por në rritje. Në nivel global, deri më tani kanë vdekur 3,200 njerëz.