Ministria e Shëndetësisë njoftoi për 10 raste të reja me COVID-19 në 24 orët e fundit, mes të cilëve edhe një mjek nga spitali i Durrësit. Nga të prekurit, 25 janë vetëizoluar në shtëpi dhe tetë të tjerët po trajtohen në spitalin Infektiv.
Ministria e Shëndetësisë njoftoi të premten se 33 persona rezultojnë të prekur nga koronavirusi COVID-19 në Shqipëri, mes të cilëve edhe një mjek në qytetin e Durrësit. Numri i rasteve është rritur me dhjetë brenda 24 orëve të fundit.
Sipas Ministrisë së Shëndetësisë, numri më i lartë i të prekurve është shënuar në Tiranë me 19 raste, i ndjekur nga Durrësi me 5 raste. Në hartën e përhapjes së koronavirusit u shtua të premten edhe qyteti i Fierit me 4 raste; dy raste në Elbasan, dy në Rrogozhinë dhe 1 në Lushnje.
Nga personat e prekur, 25 janë në gjendje të mirë shëndetësore dhe qëndrojnë të vetëizoluar në shtëpi, ndërkohë që numri i të shtruarve në spitalin Infektiv në Qendrën Spitalore Universitare “Nënë Tereza” ka mbërritur në tetë.
Ministria e Shëndetësisë njoftoi gjithashtu se ka kryer 89 testime në spitalin e Durrësit –ku humbi jetën një 73-vjeçare, e cila dyshohet se është infektuar me COVID-19 në Itali.
Një mjek i këtij spitali ka rezultuar pozitiv, por sipas Ministrisë nuk ka simptoma dhe është vetëizoluar në shtëpi.
Prej mëngjesit të së premtes, qeveria ka urdhëruar ndërprerjen e qarkullimit mes Tiranës dhe Durrësit dhe gjashtë qyteteve të tjera; mes të cilave Shkodra, Lezha, Elbasani, Lushnja, Fieri dhe Vlora.
Dhjetra forca të Policisë dhe Ushtrisë janë shpërndarë nëpër pikat hyrëse të qyteteve, duke bllokuar qarkullimin e automjeteve.
Nga kryeministri Edi Rama e deri tek drejtuesit e shëndetësisë kanë përshkallëzuar thirrjet ndaj qytetarëve, duke u kërkuar atyre që të qëndrojnë në shtëpi.
“OBSH ka shpallur pandeminë nga koronavirusi i ri, që do të thotë se bot aka transmetim komunitar në më shumë se dy kontinente. Kjo është një situatë që duhet vlerësuar me seriozitet dhe masat që janë marrë për distancim social duhet të merren me seriozitet,” apeloi Silva Bino, shefja e departamentit të Epidemiologjisë në Institutin e Shëndetit Publik.
