Autoriteti urdhëroi kompanitë që shesin dezifektant, alkool dhe maska të ndërpresin abuzimin me çmime ose do të përballen me gjoba.
Autoriteti i Konkurrencës në Shqipëri kërcënoi disa kompani që tregtojnë pajisje dhe produkte paramjekësore të tilla si dezifektant, alkool dhe maska të ndërpresin spekulimin me çmime për shkak të kërkesës së shkaktuar nga COVID-19 ose përndryshe rrezikojnë të gjobiten me deri 10% të xhiros vjetore.
Autoriteti mori dy vendime të Mërkurën, i pari për të hapur hetim të thelluar në këtë segment të tregut dhe i dyti, për të urdhëruar kompanitë të bëjnë transparente çmimet e produkteve të tyre dhe të ndërpresin abuzimin.
Sipas vendimit, “në kushtet e emergjencës shëndetësore, për shkak të rrezikut të kryerjes së një dëmi të rëndë dhe të pariparueshëm për konkurrencën në tregun e shitjes me shumicë dhe pakicë të materialeve paramjekësore (dezifektant, alkool dhe maska), pasi ka të ngjarë të ketë shkelje të neneve 4 dhe 9 të këtij ligji, për shkak të rritjes së pajustifikueshme të çmimit të tregtimit,” urdhërohet “ndalimin e sjelljes së ndërmarrjeve që veprojnë në rrjetin e tregtimit me shumicë dhe pakicë (importues, depo farmaceutike dhe farmaci) të materialeve paramjekësore, të cilat në mënyrë të drejtëpërdrejtë apo të tërthortë vendosin çmime apo kushte të padrejta tregtimi.”
“Në rast të moszbatimit të vendimit për masa të përkohshme të cituara në pikën (1) të këtij vendimi, ndërmarrjet që do të konstatohen në shkelje ndëshkohen me gjobë deri në 10 % të xhiros vjetore për shkelje të rëndë të konkurrencës,” shkruhet në vendim.