Nga 32 persona të testuar në 24 orët e fundit nga Instituti i Shëndetit Publik, pesë prej tyre rezultuan pozitivë me COVID-19, mes të cilëve tre italianë dhe dy qytetarë të Kavajës.
Instituti i Shëndetit Publik ka testuar 32 persona të dyshuar në 24 orët e fundit, nga të cilët pesë kanë rezultuar të infektuar me virusin e ri COVID-19. Sipas drejtoreshës së ISHP, Albana Fico, tre prej të infektuarve të rinj janë shtetas italianë me banim në Tiranë, ndërsa dy të tjerët janë një 80 vjeçar dhe një 42 vjeçar nga qyteti i Kavajës.
Rastet e reja e çuan në 64 numrin total të personave të konfirmuar me COVID-19 deri të enjten më 19 mars në Shqipëri. Numri i të infektuarve në Tiranë shkoi në 45 persona ose 70% e totalit, ndërkohë që hartës së qyteteve të prekura iu shtua edhe Kavaja me 2 raste.
“Në spitalin Infektiv ndodhen 32 pacientë të shtruar, tre prej të cilëve janë në terapi intensive. Asnjë pacient nuk është në respirim të drejtuar,” tha Fico të enjten në një deklaratë për median.
Koronavirusi ka shkaktuar vdekjen e dy personave në Shqipëri; një 73-vjeçare nga Durrësi dhe një 66-vjeçar nga Lushnja, të cilët vuanin edhe nga sëmundje të tjera shoqëruese.
Instituti i Shëndetit Publik ka kryer 697 teste gjithsej të COVID-19 që nga shpërthimi i epidemisë, duke ngritur pikëpyetje dhe debat publik për numrin e testeve në dispozicion apo nëse ato po kryheshin mjaftueshëm.
Fico deklaroi të enjten se Instituti i Shëndetit Publik ka marrë ‘një tjetër sasi të konsiderueshme testesh”, pa dhënë detaje mbi numrin e tyre apo mënyrën se si janë siguruar.
Organizata Botërore e Shëndetësisë deklaroi të enjten se numri i rasteve të konfirmuara me COVID-19 tejkaloi shifrën 200.000 mijë në të gjithë botën, duke shkaktuar vdekjen e 8648 personave.
Italia vazhdon të shënojë rekordin më negativ në Europë me mbi 35 mijë raste të infektuarish dhe me 475 persona të vdekur vetëm në 24 orët e fundit.