Kryeministri Edi Rama deklaroi se individët dhe subjektet që kanë dhënë me qira mjedise për biznesin e vogël urdhërohen të mos e marrin qiranë gjatë periudhës së COVID-19 dhe po kështu edhe qiradhënësit e shtëpive në rast se qiramarrësi ka humbur punën.
Qeveria shqiptare ka në plan të pezullojë përmes një akti normativ pagesën e qirasë mujore të biznesit të vogël dhe familjeve të personave që kanë humbur punën, bëri të ditur kryeministri Edi Rama në një status për ndjekësit e tij në rrjetin social Facebook.
Rama nuk bëri të ditur se nga çfarë date fillon zbatimi i një mase të tillë, por kërcënoi qiradhënësit me një gjobë në masën pesëfish me qiranë në rast se e kërkojnë atë.
“Me aktin normativ për masat e veçanta do të ndalohen pagesat e qirave nga ana e bizneseve të vogla dhe familjarëve të regjistruar në punë, që kanë ndaluar punën për shkak të luftës!”, shkoi Rama.
“Qiradhënësit do të ndalohen t’u kërkojnë pagesën mujore këtyre subjekteve ose do të penalizohen me gjobë sa pesëfishi i vlerës së qirasë përkatëse!”, shtoi ai.
Aktualisht pjesa dërrmuese e biznesit të vogël është e paralizuar që nga mesi i Marsit. Një pjesë, si kafetë dhe restorantet, janë të ndaluara me urdhër nga Ministria e Shëndetësisë ndërsa pjesa tjetër thjeshtë nuk kanë biznes.
