Në 24 orët e fundit u zbuluan 27 raste të reja me COVID-19, dymbëdhjetë prej të cilëve u përkasin dy rretheve familjare në qytetin e Shkodrës.
Kurba e rasteve të reja të prekura me COVID-19 u rrit sërish të enjten, ku 27 persona rezultuan pozitivë nga 112 testime të kryera në 24 orët e fundit në Shqipëri. Zv.ministrja e Shëndetësisë, Mira Rakacolli tha në një deklaratë për mediat se 12 persona të prekur ose 44% e rasteve të reja u zbuluan vetëm në qytetin e Shkodrës –një vatër e dyfishuar tashmë nga koronavirusi i ri.
Zgjerimi i të prekurve në 24 orët e fundit e ka çuar në 304 numrin e personave të infektuar me COVID-19 në Shqipëri. Nga këta, 73 pacientë ndodhen të shtruar në Spitalin Infektiv në Tiranë dhe 4 të tjerë në spitalin e mushkërive “Shefqet Ndroqi”, i cili ka marrë tashmë emrin COVID 2.
“Në shërbimin e spitalit Infektiv ndodhen të shtruar 73 pacientë, shtatë prej të cilëve në terapi intensive dhe dy në gjendje të rëndë dhe të intubuar. Tre pacientë u transportuan sot në mëngjes nga Spitali Infektiv në spitalin COVID 2, i cili do të trajtojë rastet e rënda. Aktualisht në këtë spital ndodhen 4 pacientë, dy prej të cilëve në gjendje të rëndë dhe të intubuar,” deklaroi Rakacolli.
Vatra e infeksionit u rrit sërish në Tiranë duke shënuar 146 raste, por Ministria e Shëndetësisë shprehu shqetësim për një dyfishim të rasteve në qytetin e Shkodrës, ku numri i të prekurve është tashmë 22.
“Rastet e Shkodrës janë dyfishuar me 12 raste të reja, të cilat janë zbuluar në dy rrethe familjare,” deklaroi Rakacolli, e cila shtoi se mes të infektuarve ishte edhe një fëmijë 13 vjeç. “Shtimi i rasteve në Shkodër tregon edhe njëherë mosrespektimin e masave të distancimit social dhe atyre për kufizimin e infeksionit që Ministria e Shëndetësisë vazhdon të rekomandojë,” shtoi Rakacolli.
Rritja e numrit të rasteve të reja në Shqipëri erdhi pas disa ditëve të qeta, ku numri i të infektuarve ditorë u ul ndjeshëm. Të mërkurën, numri i rasteve të reja ishte 18.
Pandemia e COVID-19 ka shkaktuar 16 të vdekur në Shqipëri, ndërsa infeksioni ka prekur edhe 32 mjekë dhe infermierë. Zv.ministrja e Shëndetësisë tha se lajmi i mirë është numri i personave të shëruar nga virusi, i cili ka arritur tashmë në 89 persona. Vetëm në 24 orët e fundit janë shëruar 13 pacientë.
