Në 24 orët e fundit janë testuar 182 persona, nga të cilët kanë rezultuar pozitivë vetëm gjashtë prej tyre. Sipas Binos, përhapja po ndodh kryesisht në vatra familjare.
Numri i rasteve të reja me COVID-19 zbriti në gjashtë të martën, pas testimit të 182 personave të tjerë nga Instituti i Shëndetit Publik në 24 orët e fundit. Silva Bino nga ISHP tha në një deklaratë për mediat se 4 prej rasteve të reja janë identifikuar në Tiranë, 1 në Elbasan dhe 1 në qytetin e Korçës.
Testimet e reja e çuan numrin total të të prekurve në Shqipëri në 383 raste. Nga këta, 22 persona e kanë humbur betejën me sëmundjen dhe 131 të tjerë konsiderohen tashmë të shëruar nga COVID-19.
Ndërkohë, 67 persona ndodhen nën trajtim mjekësor në spitalin Infektiv në Tiranë dhe 7 të tjerë në spitalin e mushkërive “Shefqet Ndroqi”, i cili njihet tashmë si COVID 2. Sipas Binos, 11 prej pacientëve ndodhen në terapi intensive dhe tre prej tyre janë aktualisht të intubuar.
Krahasuar me një ditë më parë, harta e infeksionit është zgjeruar vetëm në Tiranë, Elbasan dhe Korçë dhe përgjithësisht brenda rretheve familjare.
“Ne kemi disa vatra, që kryesisht janë vatra familjare edhe për shkak të masave të marra të distancimit social apo të distancimit fizik. Qytetarët duhet të respektojnë rregullat e distancimit edhe brenda rretheve të tyre familjare, duke shmangur vizitat apo pjesmarrjet në rastet e mortit tha Bino.
