Koronavirusi i ri mbërrin për herë të parë në qytetin e Kukësit, ndërkohë që numri i të prekurve rritet në Tiranë dhe në Shkodër. Vdekja e një 68-vjeçareje e çon numrin e viktimave në 24.
Instituti i Shëndetit Publik konfirmoi të martën 8 raste të reja me COVID-19, mes të cilëve dy punonjës të shëndetësisë në Shkodër dhe në Kukës. Shefja e Survejancës dhe e Inteligjencës Epidemike në ISHP, Eugena Tomini tha në një deklaratë për mediat se rastet e reja ishin zbuluar mes 236 personave të testuar në 24 orët e fundit, 45 prej të cilëve ishin personel shëndetësor.
“Deri tani janë testuar 4306 persona të dyshuar në total, nga të cilët 475 kanë rezultuar pozitivë,” tha Tomini. Ajo e konsideroi kurbën e përhapjes së COVID-19 në Shqipëri “me qëndrueshmëri”.
Të martën, harta e infeksionit të COVID-19 u zgjerua në Tiranë me 6 raste, në Shkodër me 1 rast dhe u shtri për herë të parë në qytetin verior të Kukësit, ku një personel shëndetësor rezultoi pozitiv.
Tirana vazhdon të mbetet vatra më e nxehtë e vendit me 227 raste ose 47% të totalit të rasteve, e ndjekur nga Shkodra me 71 persona të infektuar ose gati 15% të rasteve në rang vendi. Qyteti i tretë në hartë është Durrësi me 42 raste ose 8% të totalit.
Pasditen e së hënës, një paciente 68 vjeçare nga Tirana humbi betejën me sëmundjen, duke e çuar numrin total të viktimave nga COVID-19 në Shqipëri në 24. Vdekshmëria nga COVID-19 në Shqipëri qëndron në nivelin 5% të të gjitha rasteve të konfirmuara.
Në shërbimin Infektiv në Tiranë dhe në spitalin e mushkërive “Shefqet Ndroqi”, i kthyer në COVID 2 po trajtohen aktualisht 46 pacientë. Mes tyre, 12 pacientë janë në terapi intensive dhe 5 në gjendje më të rëndë dhe të intubuar.
Ndërkohë, 16 pacientë të tjerë janë shëruar nga sëmundja në 24 orët e fundit, duke e çuar numrin total të të shëruarve në 248 ose më shumë se gjysma e rasteve të konfirmuara deri tani me koronavirusin e ri.
