Gjatë 24 orëve të fundit, Shqipëria shënoi numrin më të lartë të rasteve të personave të prekur nga koronavirusi i ri ndërsa autoritetet u ngushëlluan me faktin se shumica e tyre janë asimtomatikë dhe se numri i të shtruarve në spital mbetet i ulët.
Shqipëria pësoi një rritje të konsiderueshme të rasteve të personave të prekur nga koronavirusi gjatë 24 orëve të fundit, ku harta e të prekurve u zgjerua dhe dy vatra të reja, një në fasoneri në Krujë dhe një në paraburgimin e Tiranës sollën përhapje të mëtejshme të sëmundjes që i ka mbyllur shqiptarët që nga mesi i Marsit dhe ka paralizuar pjesën më të madhe të ekonomisë.
Gentiana Qirjako nga Instituti i Shëndetit Publik deklaroi se 34 persona të tjerë i janë shtuar numrit të të prekurve pas kryerjes së testimit te 237 persona të dyshuar.
Kruja shënoi 18 raste të reja duke e rritur numrin e të infektuarve në qytet në 83. Por me këtë vatër në Krujë lidhet edhe një numër rastesh në Kurbin, ku deri tani janë prekur 31 persona si dhe rasti i parë në Mat.
Opozita ka akuzuar qeverinë se ka vënë përfitime të pakta ekonomike mbi jetët e njerëzve me vendimin për të mos mbyllur fabrikat, të cilat zakonisht grumbullojnë punëtorë nga qytete dhe fshatra të ndryshme me transport me furgon dhe autobuz për t’i dërguar në fabrikë, gjë që vështirëson zbatimin e praktikës së distancimit social.
Megjithatë Instituti i Shëndetit Publik duket se sugjeroi se rasti i Krujës nuk ka lidhje me vendimin për të mos mbyllur fabrikat por me dobësitë e njerëzve që nuk kanë zbatuar rregullat e distancimit social.
Qirjako deklaroi: “Në asnjë fasoneri tjetër nuk kemi asnjë rast simptomatik. Kjo tregon qartë se në këtë përballje me koronavirusin, rolin kryesor e luan sjellja jonë në raport me rregullat”.
Qeveria shqiptare ndërmorri gjatë këtyre shtatë javëve një numër masash kërcënuese ndaj popullsisë, përfshirë gjoba prej miliona lekësh, heqje patentash dhe kërcënime me burg në rastet e shkeljes së urdhrave për të qëndruar në shtëpi ndërsa funksionarë të ndryshëm aluduan në mënyrë të përsëritur se një shpërthim epidemik në Shkodër lidhej me një qëndrim sfidues të popullsisë ndaj urdhrave të qeverisë.
Por pas shpërthimit të rasteve në Krujë, zyrtarë të ndryshëm të qeverisë kanë tendencën të pranojnë se në fakt, dhuna policore, e cila i ka rikujtuar shqiptarëve arbitraritetin e shtetit të kohës së komunizmit, vështirë se ndihmon në luftimin e përhapjes së një virusi.
Pas identifikimit të rasteve në Krujë, Policia e Shtetit njoftoi se ka gjobitur dy fabrika fason në Krujë me 100 mijë dhe 300 mijë lekë secila ndërsa ka bllokuar dy automjete që shërbenin për transportin e punëtorëve.
Në total deri të Shtunën në Shqipëri ka 712 persona të prekur, nga të cilët, 403 persona janë shëruar dhe 27 kanë vdekur.
Gjatë 24 orëve të fundit, jo vetëm që është shënuar numri më i lartë i të prekurve, por edhe qytete që kishin ditë që raportonin zero infeksione kanë shënuar raste të reja.
Në Kukës pati 4 raste të reja, kontakte të një pacienti të identifikuar një ditë më parë ndërsa raste të reja janë identifikuar edhe në Berat e Lushnjë.