Numri total i të prekurve nga koronavirusi i ri në Shqipëri shkoi në 736 persona, 57% e të cilëve janë tashmë të shëruar.
Ministria e Shëndetësisë deklaroi të hënën edhe 10 raste të reja me COVID-19 në Shqipëri, nga të cilat nëntë raste u zbuluan në Tiranë dhe një tjetër rast i ri në qytetin e Shkodrës. Zv.ministrja e Shëndetësisë, Mira Rakacolli tha se në 24 orët e fundit ishin testuar 212 persona, nga të cilët vetëm 4.7% rezultuan pozitivë.
Të hënën, numri total i personave të prekur nga koronavirusi i ri në Shqipëri shkoi në 736 raste. Nga këta, 422 persona ose 57% e rasteve janë shëruar, ndërsa 286 të tjerë konsiderohen të prekur aktivë. Ndërkohë, 28 persona kanë ndërruar jetë që prej fillimit të epidemisë në Shqipëri.
Në dy spitalet e vendosura në dispozicion të pacientëve të COVID-19 ndodheshin të shtruar të hënën 34 persona. Nëntë prej tyre ndodhen në terapi intensive dhe dy në gjendje më të rëndë dhe të intubuar.
Harta e virusit u zgjerua sërish në Tiranë dhe në Shkodër; dy qytetet e prekura më rëndë në Shqipëri. Numri total i të prekurve në kryeqytet shkoi në 302 persona, 61% e të cilëve janë tashmë të shëruar, ndërsa në Shkodër numërohen 105 raste, 58% e të cilëve të shëruar.
I treti në listë, qyteti i Krujës numëron 92 raste të infektuara, të cilat lidhen kryesisht me ndërmarrjet e fasonerive në këtë bashki. Të zbuluara më vonë, Kruja dhe Kurbini kanë numrin më të ulët të personave të shëruar, respektivisht 8 persona në Krujë dhe ende asnjë i shëruar në Kurbin.
