Tregtarët e fruta-perimeve në tregun e mbyllur të Zdrales në Shkodër protestuar para bashkisë kundër vendimit për të shtyrë hapjen e tregut përtej dy javëve që ishte vendosur të mbahej mbyllur fillimisht.
Të mbetur pa zgjidhje gati dy javë pas mbylljes së tregut në Zdrale për shkak të mungesës së masave të sigurisë ndaj epidemisë, dhjetra tregtarë që punojnë aty shkelën rregulat e karantinimit dhe protestuan për mbi 30 minuta para Bashkisë Shkodër të hënën, por u detyruan të shpërndahen pa marrë përgjigje nëse do të kishte një zgjidhje.
Tregu i Zdrales u mbyll më 14 prill me urdhër të Bashkisë Shkodër pas zbulimit të një vale të infektuarish që e bëri atë qytetin e dytë më të prekur në vend. Por tregtarët që shisnin aty fruta dhe perime me pakicë thonë se janë lënë pa asnjë mundësi tjetër për të jetuar.
“Kaluan dy javë. Ne ishim dakord edhe pse do kishim humbje pasi malli ynë nuk pret dy javë prishet, por masat mbrojtëse në situatën që kalojmë i gjykuam normale.Tani thonë do rrini mbyllur deri me 23 qershor. Kjo do thotë që ne të vdesim urie, pasi e kemi të vetmin burim jetese”, tha një nga tregtarët.
Shefi i policisë bashkiake që foli me tregtarët duke u kërkuar të shpërndaheshin, u tha atyre se vetëm mund të përcillte shqetësimet, por se nuk u premtonte dot zgjidhje.
“Të jeni të sigurt se çdo kërkesë tuajën do e përcjell tek kryetarja dhe administrata, por tregu do jetë i mbyllur deri në një urdhër tejtër ose do vazhdojë deri në afatin e përcaktuar”, tha Hasanpapaj.
Tregtarët us hprehën të zemëruar se afati i mbylljes së tregur, që ishte caktuar fillimisht për 2 javë, është zgjatur ndërsa atyre nuk është dhënë asnjë zgjidhje. “Mos na vini këmbën në fyt”, thotë njëri prej protestuesve, duke iu drejtuar përfaqësuesit të Bashkisë. Tregtarët thanë se kishin humbur një pjesë të mallit pasi u mbyllën pa paralajmërim, ndërsa nuk janë të përfshirë as në listat e atyre që përfitojnë nga ndihmat financiare që shpërndan qeveria.
Bajram Hamiti, një prej shitësve, pranoi që tregu mund të mos hapej, por kërkoi një hapësirë ku mund të vijonte punën. “Të na gjejnë vendin për të shitur, ne nuk duam që të na falin gjë. Jemi qytetarë të këtij vendi”, tha Hamiti.
Pas më shumë se 30 minutash në protestë, tregtarët janë kthyer në shtëpi vetëm me premtimin se do gjendet një zgjidhje për problemin e tyre, por thanë se do të ktheheshin në protestë nëse nuk ndihmoheshin.
