Tirana dhe Kruja vazhdojnë të mbeten vatrat aktive të infeksionit në Shqipëri, ndërkohë që një rast u zbulua në Kukës mes personave të kthyer nga jashtë dhe të karantinuar.
Tirana dhe Kruja vazhdojnë të mbeten vatrat aktive të COVID-19 në Shqipëri, ndërsa Instituti i Shëndetit Publik raportoi 7 raste të reja të konfirmuara në 24 orët e fundit. Sipas Eugena Tominit nga ISHP, pesë raste i përkasin Tiranës, 1 rast Krujës dhe 1 rast konsiderohet i importuar në Kukës, pasi u evidentua mes personave që gjenden në karantinë.
Numri i personave të prekur nga COVID-19 në Shqipëri shkoi në 789 persona të shtunën, nga të cilët 519 prej tyre ose 65% e totalit janë shëruar tashmë nga sëmundja. Pacientët aktivë llogariten në 239 persona, pjesa më e madhe e të cilëve janë asimptomatikë ose po ndiqen nga mjeku i familjes.
Të shtunën, 31 pacientë ndodheshin të shtruar në spitalin Infektiv në Tiranë dhe në spitalin universitar “Shefqet Ndroqi”, ku po marrin trajtim shëndetësor për pasojat e shkaktuara nga virusi SARS-CoV-2. Në spital ndodhen 11.4% e pacientëve aktivë të Shqipërisë, shtatë prej të cilëve janë në terapi intensive.
Që prej fillimit të epidemisë, 31 persona kanë humbur jetën si pasojë e COVID-19. Fatalitetet përbëjnë 3.9% të të gjitha rasteve të prekura.
Ministria e Shëndetësisë përsërit apelin për zbatimin e masave të distancimit social dhe ato të higjienës personale për qytetarët, pavarësisht lehtësimit të masave të kufizimit të lëvizjes për parandalimin e epidemisë. Ndërsa fashat e lëvizjes së qytetarëve janë lehtësuar tashmë, qeveria planifikon të hapë parukeritë dhe klinikat dentare më 11 maj dhe pjesërisht baret dhe restorantet më 18 maj.