Instituti i Shëndetit Publik bëri të ditur të Dielën se gjatë 24 orëve të fundit ka pasur vetëm 6 raste të reja në Kurbin, Krujë dhe Tiranë ndërsa qyteti i Fierit iu shtua listës së zonave ku nuk janë shënuar raste të reja prej shumë ditësh. Kurba shqiptare e koronavirusit ka shënuar rastin e tretë të rënies.
Numri i infektimeve të reja me koronavirus në Shqipëri ra në 6 gjatë 24 orëve të fundit, shifra më e ulët e shënuar që nga data 7 Prill. Instituti i Shëndetit Publik deklaroi të Dielën se rënia e infektimeve të reja të zbuluara tregon se “masat e marra nga sistemi ynë shëndetësor bëjnë të mundur kalimin me sukses të fazës së parë të epidemisë”.
Por ndërsa numri i infektimeve ka rënë, Kruja u bë së fundmi qyteti i dytë më i prekur në Shqipëri dhe aktualisht është qyteti me numrin më të lartë të rasteve aktive. Deri më sot në Krujë janë identifikuar 111 raste nga të cilat, deri të Dielën, 90 janë ende raste aktive. Kruja kapërceu për nga numri i të prekurve Shkodrën, pavarësisht se qyteti i vogël ka vetëm 12 mijë banorë.
Numri i rasteve të reja në Shqipëri ka njohur një ecuri të pazakontë, me tre kulme të shënuara më 28 Mars, më 4 Prill dhe me 25 Prill, gjë që e bën të paqartë nëse hetimi epidemiologjik do të jetë në gjendje të izolojë vatrat e sëmundjes apo jo.
Pavarësisht kësaj, Shqipëria ka hyrë në fazën e lehtësimit gradual të kufizimeve të imponuara për ruajtjen e distancave sociale dhe një pjesë e madhe e qyteteve po i kthehen jetës normale. Fieri është qyteti i rradhës që iu shtua listës së zonave ku vatrat e virusit janë shuar, pacientët janë shëruar dhe nuk janë identifikuar raste të reja prej kohësh.
“Gjatë 24 orëve të fundit një zonë tjetër e Shqipërisë i shtohet listës së zonave me rrezik të ulët dhe kjo zonë është Fieri”, deklaroi Gentiana Qirko nga Instituti i Shëndetit Publik të Dielën.
Qyteti i Fierit pati 37 persona të prekur nga koronavirusi ndërsa rasti i fundit është identifikuar në datë 25 Prill. Ndër qytetet e tjera ku nuk janë shënuar raste të reja prej shumë ditësh është Durrësi, i cili ka rastin e fundit pozitiv në datë 13 Prill, Korça që nuk ka rast të ri nga 19 Prilli, apo Lezha ku rasti i fundit është shënuar në 4 Prill.
Tirana, Kruja dhe Kurbini mbeten aktualisht vatra aktive ku infeksioni vijon të përhapet.