Banka Europiane për Rindërtim dhe Zhvillim vlerëson se kriza e shkaktuar nga pandemia do të sjellë një rënie në masën 9% të Prodhimit të Brendshëm Bruto të Shqipërisë për vitin 2020 e pasuar nga një ringritje në masën 12% në vitin 2021.
BERZH publikoi të Mërkurën parashikimin e vet për rajonin e euro-azisë ku kjo bankë është e pranishme, ku theksohet se Shqipëria dhe Mali i Zi ka gjasa do të goditen më shumë nga kriza e shkaktuar nga koronavirusi se sa vendet e tjera për shkak të shkallës së hapjes që kanë këto ekonomi, përfshirë rëndësinë që ka turizmi në të dyja vendet si dhe varësia që Shqipëria ndaj eksporteve të tekstileve dhe të shërbimeve.
BERZH vlerëson gjithashtu se kriza ekonomike në vendet e tjera si Itali e Greqi pritet të sjellë edhe rënie të remitancave.
Ky është vlerësimi më negativ i ekonomisë shqiptare deri tani. Më herët, Fondi Monetar Ndërkombëtar dhe Banka Botërore vlerësuan për një rënie më të paktë këtë vit dhe një ringritje krahësismisht më të paktë në vitin 2021.
Si në këtë vlerësim, ashtu edhe në vlerësimet e mëparshme, Shqipëria raportohet si vend që do të preket më fort se sa vendet e tjera. BERZH-i thonë se ekonomia në të gjitha vendet që ajo vepron nga Europa Lindore deri në Azinë Qendrore do të kontraktohet me 3.5% dhe do të ringrihet me 4.8% vitin e ardhshëm.
Të gjitha raportet theksojnë gjithashtu se parashikimet janë shumë të pasigurta për shkak se situata ndryshon me ditë.
