Hristo Javacheff “Christo”, i cili u bë i famshëm për mbështjelljen e ndërtesave me pëlhurë, përfshirë dhe Rejshtagun, ka ndërruar jetë në Nju Jork në moshën 84-vjeçare.
Artisti bashkëkohor Hristo Vladimirov Javacheff “Christo” ndërroi jetë prej shkaqeve natyrore në moshën 84-vjeçare në Nju Jork, njoftuan pak para mesnatës më 31 maj përfaqësuesit e tij. “Christo e jetoi jetën e tij në maksimum, jo vetëm duke ëndërruar atë që dukej e pamundur, por duke e realizuar atë”, tha zyra e tij.
Lindur në Gabrovo, Bullgari, në vitin 1935, ai u arratis nga regjimi komunist pas luftës kur ishte 22 vjeç, duke jetuar në Pragë, Vjenë dhe Gjenevë, përpara se të vendosej për disa vjet në Paris. Atje, në vitin 1957, ai u takua me partneren dhe bashkëpunëtoren e tij Jeanne-Claude, e cila ndërroi jetë në 2009.
Së bashku ata bënë vepra arti të njohura dhe kontroverse, shpesh duke përfshirë monumente dhe peizazhe të mbështjella me pëlhurë, duke përfshirë Rejshtagun në Berlin, Pont-Neuf në Paris dhe Cetral Park në Nju Jork.
Kohët e fundit, Christo tërhoqi 1.2 milionë vizitorë në projektin e tij “Skelat pluskuese” në liqenin Iseo pranë Brecias, Itali, dhe në vitin 2018 prezantoi një tjetër instilacion pluskues, “Mastaba e Londrës”, në liqenin Serpentine në Londër.
“Më pëlqejnë gjërat e vërteta. Gjërat e vërteta! Era e vërtetë, thatësira e vërtetë, frika e vërtetë, gëzimi i vërtetë…”, tha ai në dokumentarin më të fundit mbi punën e tij, “Duke ecur mbi ujë”, nga Andrey Paounov.
Gjatë 56 viteve të fundit të jetës së tij, Christo jetoi në Nju Jork.
Ai vdiq ndërsa ende punonte për disa projekte të ndryshme. Vepra e tij e fundit e artit e përkohshme në Paris titullohet “Harku i Triumfit, i mbështjellë” dhe është planifikuar të ekspozohet nga data 18 shtator deri më 3 tetor 2021. Përveç saj, një shfaqje e madhe në qendrën rreth fillimeve të Christo dhe Jeanne-Claude në Paris do të shfaqet këtë vit nga 1 korriku deri më 19 tetor 2020.