Policia e Vlorës gjeti 21 emigrantë nga Egjipti në një shtëpi në Vlorë dhe ndaloi pronarin e banesës, ndërsa po hetohet për rikthim të trafikut me gomone përmes Otrantos.
Vështirësimi i kalimit për në Europën Perëndimore për refugjatët nga Afrika e Veriut dhe Lindja e Mesme, duket se ka rihapur në Vlorë biznesin e trafikut të qenieve njerëzore me gomone përmes detit.
Këtë të enjte në qendër të qytetit të Vlorës, policia lokale zbuloi një bazë të strehimit të emigrantëve në një shtëpi në qendër të qytetit. 21 klandestinë nga Egjipti u gjetën brenda shtëpisë, ndërsa u arrestua pronari i shtëpisë Petrit Pashaj, i cili siç tha policia kishte sjellë ushqimin për vaktin e mesditës për 21 klandestinët kryesisht të rinj të cilët srehoheshin aty.
Burime nga policia lokale i thanë BIRN se dyshonin se klandestinët kishin mbërritu në Vlorë pak ditë më parë dhe se ata po pritnin të kalonin në Itali përmes detit.
Në shtëpinë ku ishin strehuar klandestinët u gjetën ushqime dhe sende personale. Policia tha se kjo kishte ngritur dyshime se banesa është përdorur nga një rrjet i mirëorganizuar për trafikimin e qënieve njerëzore drejt Italisë.
Policia e Vlorës tha se shtëpia ishte mbajtur në mbikqyrje disa ditë me rradhë. Ky është rasti i dytë brenda dy muajsh kur policia e Vlorës heton një rast trafikimi të qënieve njerëzore për këtë vit.
Në 20 prill u arrestuan dy persona dhe u sekuestrua një gomone, ndërsa të arrestuarit u përballën me akuzën e dhënies së ndihmës në kalimit të paligjshëm të kufirit ndërsa në dosjen hetimore u bashkangjitën edhe deponimet e disa refugjatëve sirianë të ndaluar nga policia Italiane.
Ndërkohë në Janar dy grupe me refugjatë nga vende të Lindjes janë konstatuar nga policia në Novoselë pak metra larg grykëderdhjes së Vjosës, ndërsa udhëtonin drejt Jugut, përndryshe nga rruga e zakonshme drejt Malit të Zi. Rruga detare përmes Otrantos është përdorur deri në vitin 2004 masivisht për emigrantët shqiptar. Qindra persona janë mbytur në përpjekje për të kaluar në anën tjetër të Adriatikut.
Ndërkohë dy ditë më parë një investigim gazetaresk i Top Channel zbuloi një skemë masive migrimi të paligjshëm nga Lindja e Mesme drejt Europës përmes lejeve të qëndrimit në Shqipëri të mbështetura në të dhëna të rreme. Pas kësaj policia ndaloi Enkeleda Toskën, drejtoresha e Drejtorisë Rajonale për Kufirin dhe Migracionin në Tiranë si dhe tre zyrtarë të tjerë të kësaj drejtorie Altin Hasani dhe Besnik Zela si dhe një specialiste, Adelina Lita.
Në emision një sërë grupesh të trafikut të emigrantëve nga Afrika e Veriut dhe Lindja e Mesme në kryeqytet. Në bisedat e rregjistruara personat që pretendonin se organizonin trafikun premtonin udhëtime nga deti për në Bari.
Shqipëria është vend tranzit për emigrantët nga Lindja e Mesme dhe Afrika Veriore, të cilët tentojnë të mbërrijnë në vendet e Bashkimit Europian përmes Ballkanit. Ata vijnë kryesisht nga Greqia, ku kanë qëndruar ndonjëherë me muaj të tërë pasi kanë kaluar Egjeun, dhe vijojnë rrugën drejt Malit të Zi apo Kosovës.
Prej vitit 2018, fluksi i emigrantëve të parregullt të ndaluar në Shqipëri është rritur në mënyrë eksponenciale, duke e kthyer vendin në një korridor të rëndësishëm të lëvizjes së emigrantë drejt vendeve të BE-së.
Departamenti për Kufirin dhe Migracionin në Ministrinë e Brendshme i tha BIRN se numri i emigrantëve të parregullt të kapur në kufirin e gjelbër ishte 11 344 në periudhën Janar 2019-Shkurt 2020, i rritur mbi 10 herë krahasuar me vitin 2017.
