Partia Demokratike akuzoi kryeministrin se përmes një gare fiktive po përpiqej të vendoste në kontroll partiak Autoritetin e Medias Audiovizive, duke cilësuar këtë kërcënim për hapjen e negociatave me BE.
Partia Demokratike akuzoi të dielën kryeministrin Edi Rama se përkundër kërkesave të Komisionit të Venecias dhe kushteve të Bashkimit Europian për garantim të lirisë së medias dhe një Autoritet të Medias Audiovizive të pavarur, po planifikonte ta shndërronte AMA-n në institucion thellësisht partiak.
Në një konferencë për shtyp ish-deputetja e PD Albana Vokshi akuzoi kryeministrin se gara aktuale për krenun e AMA-s ishte fiktive.
“(Edi Rama) Synon që, në kundërshtim me ligjin dhe me forcën e kartonave në Kuvend, të emërojë në krye të Autoritetit të Medias, Maklen Mishën, një individ thellësisht politik, siç emëroi në krye të institucionit për komunikimet elektronike, shefin e tij të protokollit”, tha Vokshi. Ajo tha se përpjekjet e kryeministrit për të mbajtur garën fiktive binin ndesh me angazhimin për të rishikuar paketën e ashtuquajtur “të antishpifjes” sipas opinionit të Komisionit të Venecias.
Ky i fundit rekomandoi më 19 qershor ndër të tjera që ligji të mos i jepte kompteca shtesë AMA-s, ndërsa vuri në dukje se institucioni ishte në ndikimin politik dhe se forma e zgjedhjes së anëtarëve të tij duhej të ndryshonte. Komisioni i Venecias, i cili vuri në dukje se projektligji i qeverisë do kishte efekt frikësues për lirinë e medias, këshilloi një sërë ndryshimesh dhe vuri theksin te vetërregulimi.
Rama nuk e pa si negativ opinionin, i cili rrëzonte pikat kryesore të ligjit përfshi rolin e AMA-s dhe gjobat. Ai pretendoi se opinioni ishte një sugjerim i vyer dhe se do të reflektohej në rishikimin e ligjit në kuvend.
Por sipas opozitës ky qëndrim është “një lojë të dyfishtë dhe e rrezikshme për lirinë e medias”. “Nga njëra anë bën sikur është i kënaqur nga vendimi i Komisionit të Venecias, që rrëzoi ligjin e tij të censurës, nga ana tjetër vazhdon të mbajë në një garë formale vartësit e tij dhe të Erion Veliajt për kreun e AMA-s”, tha Vokshi duke iu referuar garës për kreun e AMA.
Vokshi tha se me kandidimet partiake Autoriteti i Medias degradonte “në një gjykatë politike që ndëshkon gazetarët dhe mbyll portalet sipas interesit të Edi Ramës”.
Në një shkrim të mëparshëm BIRN vuri në dukje se gara për kryetar të AMA-s, që u rihap në janar, po zhvillohej mes tre këshilltarëve të qeverisë “Rama”, Maklen Misha, Edvin Kukunja dhe Fatjon Hoxhalli si dhe drejtorit të Informacionit në Bashkinë e Tiranës, Denis Dedej.
Pozicionimi politik i kandidatëve në garë ishte vetëm një nga problemet ndërsa dokumentet e siguruara nga BIRN ngrenë dyshime edhe për procedurën e verifikimit parlamentar, pasi asnjë prej kandidatëve nuk plotëson sipas deklarimeve në Sigurimet Shoqërore, kushtin e vjetërsisë prej 10 vitesh në punë.
Gara për kryetarin e AMA-s cilësohet jo-serioze dhe politike nga organizatat e medias në Shqipëri, të cilat parashikojnë një skenar të rrezikshëm në dritën e miratimit të mundshëm të së ashtuquajturës “paketa antishpifje”, sipas të cilës autoriteti merr atributet e një gjykate.
“Një skenar akoma më i rrezikshëm do të ishte zgjedhja e një kandidati politik në krye të AMA-s, në kushtet kur prej një viti tentohet votimi i një ligji “të rrëzuar” nga gjithë organizmat ndërkombëtarë,” tha Elvin Luku, pedagog dhe drejtues i MediaLook.
Pretendentët për kreun e AMA-s refuzuan për BIRN që të konsiderohen kandidatë politikë, ndonëse mbajnë poste në kabinetet ministrore.