Pandemia e koronavirusit goditi Shqipërinë duke filluar nga gjysma e dytë e marsit por paraliza e përgjithshme ekonomike mjaftoi që Prodhimi i Brendshëm Bruto i vendit të reduktohej me 2.5% në matjen që bëhet për të gjithë tremujorin e parë.
Ekonomia shqiptare u reduktua me 2.5% në tremujorin e parë të këtij viti me rënie në të gjithë sektorët me përjashtim të bujqësisë, bëri të ditur Instituti i Statistikave të premten në vlerësimin paraprak të ecurisë së ekonomisë.
Rënia më e madhe vërehet te sektori i ndërtimit me 17% dhe te manifaktura me 8% por në rënie janë edhe sektorët e tjerë. Përkundrejt këtyre sektorëve, bujqësia rezultoi me rritje 3.4%.
Rënia e sektorit të ndërtimit në fakt duket se nuk lidhet ngushtësisht me pandeminë. Ndërtimi duket se ka ngecur si sektor që nga tremujori i dytë i vitit të kaluar ndërsa gjatë pandemisë, aktiviteti i këtij sektori nuk u ndalua me urdhër të qeverisë.
Ekonomia shqiptare pritet të tkurret me së paku 5% gjatë këtij viti për shkak të COVID-19 ndërsa Shqipëria pritet të goditet më rëndë në krahasim me vende të tjera të Ballkanit për shkak se një pjesë e konsiderueshme e ekonomisë lidhet me udhëtimet dhe turizmin.
