Shqipëria shënoi një rekord të ri negativ sa i përket përhapjes së koronavirusit të ri me 117 të infektuar ndërkohë që numri i vdekjeve po rritet me shpejtësi.
Thirrjet e përsëritura të zyrtarëve të ndryshëm të qeverisë për më shumë kujdes duket se nuk kanë mjaftuar për të ndalur kurbën rritëse të përhapjes së koronavirusit të ri në Shqipëri. Të hënën më 13 korrik, Ministria e Shëndetësisë njoftoi se ka identifikuar 117 bartës të rinj të virusit, numri më i lartë deri më sot dhe hera e parë që numri i të sëmurëve kalon shifrën 100. Numri i ri rekord i të sëmurëve vjen pas një fundjavë tragjike me tetë jetë të humbura të shtunën dhe të dielën, pasuar nga 2 vdekje të tjera të hënën.
Aktualisht në Shqipëri ka 1462 të sëmurë nga COVID-19 dhe 2014 të shëruar. Numri i personave që nuk i mbijetuan sëmundjes është 95 vetë, sipas numërimit zyrtar të Ministrisë së Shëndetësisë. Së paku pesë persona të tjerë janë ndarë nga jeta ndërsa ishin të prekur nga COVID-19 por ata nuk numërohen si viktima pasi autoritetet besojnë se vdekja e tyre ka ardhur nga shkaqe të tjera dhe jo nga komplikimet e shkaktuara nga COVID-19.
Shqipëria gjendet aktualisht e izoluar nga shumica dërrmuese e vendeve të botës për shkak të numrit të lartë të të sëmurëve me COVID-19. Të hënën numri i të sëmurëve aktivë arriti në 51 për 100 mijë banorë ndërsa hapja e kufijve, sipas kritereve të vendosura nga Bashkimi Europian, mund të ndodhë vetëm pasi numri i të sëmurëve të bjerë në më pak se 16 për njëqindmijë.
Instituti i Shëndetit Publik njoftoi gjithashtu të hënën se ka kryer testimin e 585 rasteve të dyshuara, numri më i lartë i testimeve ditore deri më sot.
Situata në spitalin e sëmundjeve infektive të Tiranës nuk paraqitet e mirë. Aktualisht ka 85 persona të shtruar, nga të cilët, 10 janë në pavionin e kujdesit intensiv.
