Pasi u mor në pyetje për katër ditë me radhë në Hagë, presidenti Hashim Thaçi, një ish-lider i Ushtrisë Çlirimtare të Kosovës, tha se prokurorët duhet të konkludojnë se ai nuk ka kryer asnjë krim lufte.
Presidenti i Kosovës, Hashim Thaçi, tha të enjten në mbrëmje, pasi Zyra e Prokurorit të Specializuar e mori atë në pyetje për katër ditë rresht këtë javë, se kjo gjykatë duhet të deklarojë se ai është i pafajshëm.
“Jam i lumtur që për katër ditë pata mundësinë të dëshmoj për të gjitha çështjet që lidhen me veprimtarinë time gjatë periudhës së luftës, dhe përpjekjet e mia për paqe, stabilitet, zhvillim dhe progres”, tha për mediat Thaçi, i cili ishte një lider i Ushtrisë Çlirimtare të Kosovës gjatë luftës së viteve 1998-1999.
Thaçi tha se ai u dha prokurorëve të Hagës, të cilët po hetojnë krimet e kohës së luftës dhe pas luftës në Kosovë, “informacione për rolin tim, përgjegjësitë e mia gjatë luftës”.
Ai tha se “tani i takon prokurorit dhe gjykatësit të vlerësojnë dëshmitë e mia me paanshmëri”.
“Në rast se ata e bëjnë këtë në mënyrë profesionale dhe të paanshme, mund të vijnë në përfundimin se nuk kam bërë asnjë krim dhe asnjë shkelje”, shtoi ai.
Zyra e Prokurorit të Specializuar njoftoi muajin e kaluar se ka një aktakuzë që akuzon Thaçin, si dhe Kadri Veselin dhe ish-luftëtarë të tjerë të Ushtrisë Çlirimtare të Kosovës, për krime lufte dhe krime kundër njerëzimit. Aktakuza duhet ende të miratohet nga një gjykatës.
Një grup i vogël shqiptarësh protestuan ndaj aktakuzës para ndërtesës së Dhomave të Specializuara të hënën, kur Thaçi mbërriti për ditën e tij të parë të marrjes në pyetje, duke mbajtur pankarta ku shkruhej “Ky është racizëm”, duke kënduar këngë dhe duke brohoritur “UÇK”.
Nëse aktakuza konfirmohet nga një gjykatës, Thaçi do të gjykohet në Dhomat e Specializuara të Kosovës në Hagë. Ai ka mohuar çdo keqbërje dhe ka thënë se do të tërhiqet nga posti i presidentit nëse gjykohet.
Më shumë se 100 ish-luftëtarë të tjerë të Ushtrisë Çlirimtare të Kosovës janë marrë në pyetje nga prokurorët e Hagës, të cilët po hetojnë akuza që përfshijnë vrasje, tortura dhe ndalime të paligjshme.
Zyra e Prokurorit të Specializuar tha se i bëri publike muajin e kaluar akuzat kundër Thaçit dhe Veselit sepse pretendonte se ata ishin të përfshirë në “një fushatë të fshehtë për të rrëzuar ligjin për krijimin e gjykatës dhe për të penguar kështu punën e gjykatës në përpjekje për të siguruar që ata të mos përballeshin me drejtësinë”.
Dhomat e Specializuara të Kosovës dhe Zyra e Prokurorit të Specializuar janë pjesë e sistemit gjyqësor të Kosovës, por ndodhen në Holandë dhe përbëhen nga një ekip ndërkombëtar.
Ato u ngritën me presionin e aleatëve Perëndimorë të Kosovës, të cilët druheshin se sistemi gjyqësor i Kosovës nuk ishte aq i fuqishëm sa të gjykonte çështje kaq të ndjeshme.
E ashtuquajtura “Gjykatë Speciale” nuk simpatizohet nga shqiptarët e Kosovës, të cilët e shohin atë si një fyerje për luftën çliruese të UÇK-së nga sundimi serb.
