Kryeministri Edi Rama nënshkroi një marrëveshje me deputetin Myslym Murrizi si përfaqësues i demokratëve të parlamentit në bazë të së cilës, kuvendi do të miratojë marrëveshjen e 5 qershorit në seancën plenare të së enjtes ndërkohë që Rama këmbëngul që parlamenti të miratojë edhe ndryshimet kushtetuese të mbështetura prej tij.
Kryeministri Edi Rama deklaroi të martën në mbrëmje se forca politike që ai drejton dhe një grup deputetësh të njohur si “opozita parlamentare” kanë rënë dakord të miratojnë të enjten më 23 korrik marrëveshjen e 5 qershorit të arritur mes PS-së, PD-së dhe LSI-së për ndryshime në kodin zgjedhor. Por paralelisht me këtë, Rama deklaroi se ai dhe opozita parlamentare do të miratojnë ndryshimet kushtetuese të mbështetura nga Rama por të kritikuara nga opozita dhe ndërkombëtarët.
Telenovela politike shqiptare bën në këtë mënyrë një hap para dhe një hap anash drejt zgjidhjes që duhet ta çojë vendin për në zgjedhjet e vitit 2021.
Rama deklaroi në fund të takimit me deputetët Myslym Murrizi, Edmond Stojku dhe Nimet Musai si përfaqësues të opozitës parlamentare se ata nuk kishin arritur marrëveshje për çdo gjë por kishin arritur mirëkuptim për disa pika, të cilat konsistojnë në nevojën për dialog të vazhdueshëm politik, si dhe për miratimin më 30 korrik të ndryshimeve kushtetuese.
Rama surprizoi faktorin ndërkombëtar javën e kaluar kur deklaroi se mbështeste një propozim të opozitës parlamentare për të eliminuar mundësinë e partive politike për koalicione parazgjedhore si dhe për të rritur pragun elektoral në masën 5%. Bashkë me këto dy ndryshime, opozita parlamentare ka kërkuar “hapjen e listave” ose mundësinë që qytetarët të zgjedhin jo vetëm partinë, por edhe deputetin që duan të dërgojnë në parlament. Kjo pikë e fundit mbetet e paqartë se si do të zbatohet.
Rama argumenton se opozita parlamentare është një forcë politike reale dhe se ka kushtëzuar votën e saj për marrëveshjen e 5 qershorit me këto ndryshime kushtetuese.
Opozita jashtëparlamentare thotë se deputetët e “opozitës parlamentare” janë në xhepin e kryeministrit dhe se propozimi i tyre për rritjen e pragut elektoral dhe eliminimin e koalicioneve bien ndesh me interesat normale të partive të vogla që shumë prej tyre përfaqësojnë.
Pas marrëveshjes së mbrëmjes së të martës, opozita jashtëparlamentare deklaroi se ndryshimi i kushtetutës sipas planit të Ramës më 30 korrik në praktikë e zhbën marrëveshjen e 5 qershorit.
Pas marrëveshjes me Murrizin, Stojkun dhe Musain, kryeministri Rama deklaroi:
“I kënaqur se kemi arritur një konsensus të gjerë dhe pse jo total, për të votuar me 23 korrik marrëveshjen e 5 qershorit. dhe një konsensus të plotë jo vetëm për të votuar me 23 korrik ndryshimet për të hapur listat. Do të japin mundësi që përveç partisë të kenë votë edhe për deputetin.”
Por opozita jashtëparlamentare komentoi:
“Ndryshimi i njëanshëm kushtetues për ndalimin e koalicioneve zgjedhore zhbën të dyja marrëveshjet politike për zgjedhjet, atë të 14 Janarit dhe atë të 5 Qershorit. Edi Rama gënjen, kur thotë se po hap listat, sepse pjesën fituese të tyre, 1/3 e listës, e mban të mbyllur, duke dalë zbuluar se i vetmi qëllim është ai i ndalimit të koalicioneve si subjekt zgjedhor.”