Ish-komandanti i Ushtrisë Çlirimtare të Kosovës Agim Çeku, i cili më vonë u bë kryeministër i vendit, tha se është thirrur nga prokurorët e krimeve të luftës në Hagë për t’u marrë në pyetje si i dyshuar.
Agim Çeku tha për BIRN të enjten se ai është thirrur për t’u marrë në pyetje këtë muaj si i dyshuar nga Zyra e Prokurorit të Specializuar të Kosovës, e cila po heton krimet e luftës dhe të pasluftës në Kosovë nga 1998 në 2000.
“Po është e vërtetë. Jam thirrur për t’u marrë në pyetje si i dyshuar. Do të udhëtoj më 28 shtator”, tha Çeku, i cili ka qenë kryeministër i Kosovës nga marsi 2006 deri në janar 2008.
Si një ish-komandant i Ushtrisë Çlirimtare të Kosovës, Çeku u gjykua në mungesë nga Serbia për pasjen e përgjegjësisë komanduese për vdekjen e 669 serbëve dhe 18 jo-shqiptarëve të tjerë.
Më pas gjykata serbe e dënoi atë me 20 vjet burg në mungesë dhe Beogradi i kërkoi Interpolit të lëshonte një “njoftim të kuq” ndërkombëtar për arrestimin e tij, gjë e cila bëri që zyrtarët bullgarë ta ndalonin dhe ta mbanin atë për dy ditë në qershor 2009.
Çeku ka qenë gjithashtu Ministër i Forcës të Sigurisë së Kosovës nga shkurti 2011 deri në dhjetor 2014, kur ai u bë zv/kryeministër në qeverinë e udhëhequr nga Isa Mustafa, kreu i partisë kryesore aktuale qeverisëse, Lidhja Demokratike e Kosovës, LDK.
Gjatë kohës që Çeku ishte ministër, ai u emërua kryetari i komisionit i ngarkuar për të verifikuar statusin e veteranëve të Ushtrisë Çlirimtare të Kosovës në mënyrë që t’u mundësonte atyre marrjen e pagesave të ndihmës sociale.
Çeku është politikani i fundit i profilit të lartë që thirret për t’u marrë në pyetje. Në korrik, presidenti i Kosovës Hashim Thaçi u mor në pyetje për katër ditë me radhë në Hagë. Ai mohoi çdo keqbërje.
Zyra e Prokurorit të Specializuar njoftoi në qershor se ka një aktakuzë të pakonfirmuar që akuzon Thaçin, si dhe politikanin e lartë të Kosovës Kadri Veseli dhe ish-luftëtarë të tjerë të Ushtrisë Çlirimtare të Kosovës për krime lufte dhe krime kundër njerëzimit.
Mbi 100 ish-luftëtarë të tjerë të Ushtrisë Çlirimtare të Kosovës janë marrë gjithashtu në pyetje nga prokurorët e Hagës, të cilët po hetojnë akuzat, të cilat përfshijnë vrasje, tortura dhe ndalime të paligjshme.
Dhomat e Specializuara të Kosovës dhe Zyra e Prokurorit të Specializuar janë pjesë e sistemit të drejtësisë të Kosovës, por ndodhen në Holandë dhe kanë staf ndërkombëtar.
Ata u krijuan nën presionin e madh të aleatëve perëndimorë të Kosovës, të cilët druheshin se sistemi i drejtësisë në Kosovë nuk ishte aq i fuqishëm sa të gjykonte çështje kaq të ndjeshme.
E ashtuquajtura “Gjykatë Speciale” nuk shihet me sy të mirë nga shqiptarët e Kosovës që e shohin atë si një ofendim për luftën e UÇK-së për çlirim nga sundimi serb.
