Zyrtarët nga Serbia dhe Kosova po punojnë për një marrëveshje mbi çështjet ekonomike që pritet të nënshkruhet në prani të presidentit amerikan Donald Trump në Shtëpinë e Bardhë të premten.
Shtëpia e Bardhë njoftoi se Donald Trump do tarrë pjesë në një ceremoni nënshkrimi për një marrëveshje midis Beogradit dhe Prishtinës me presidentin Serb Aleksandër Vuçiç dhe kryeministrin e Kosovës Avdullah Hoti të premten.
Zyrtarët nga të dy delegacionet nuk kanë dhënë detaje në lidhje me marrëveshjen që pritet të nënshkruhet deri më tani, por ata kanë konfirmuar se ajo përqendrohet në tema ekonomike.
Trump më pas do të zhvillojë një takim me Vuçiçin dhe Hotin, të cilët më pas do të takojnë Sekretarin Amerikan të Shtetit Mike Pompeo në Departamentin e Shtetit.
Sipas TV Klan Kosova, katër drafte të marrëveshjes u diskutuan fillimisht, me të parën që ishte një përpjekje për të zgjidhur mosmarrëveshjen e gjatë të dy vendeve me njohje reciproke.
Vuçiç e konfirmoi këtë dhe tha se ai e refuzoi me vendosmëri sugjerimin që Serbia mund ta njohë Kosovën si të pavarur.
“Ai dokument ishte shumë i vështirë, një nga pikat ishte ajo për njohjen reciproke … Unë thashë që nuk mund ta pranojmë këtë. Njerëzit në zyrën e Trump ishin të drejtë. Ata dëgjuan ato që kishim për të thënë dhe unë mendoj se në dokumentet e tjera, i dyti dhe i treti, ajo dispozitë nuk është më”, tha Vuçiç për mediat.
Vuçiç dhe Hoti mundën të binin dakord vetëm për draftin e katërt, i cili fokusohej vetëm në çështjet ekonomike, u raportua.
Hoti tha pas takimit se të dy palët “kanë bërë përparim të madh në avancimin e bashkëpunimit ekonomik”.
“Patëm një takim me presidentin serb, këshilltarin O’Brien dhe ambasadorin Richard Grenell dhe si edhe ekipet amerikane që mbështesin këtë dialog të përqendruar në tema ekonomike. Nesër presim të finalizojmë të gjithë këtë angazhim që kemi pasur për kaq shumë kohë”, u tha Hoti gazetarëve pas takimit të së enjtes.
Mediat në Kosovë raportuan se Shtëpia e Bardhë do ta paraqesë arritjen e marrëveshjes ekonomike si një sukses që i hap rrugën një marrëveshje të përgjithshme mbi normalizimin e marrëdhënieve, duke përfshirë njohjen reciproke.
Vuçiç tha se të enjten pati gjithashtu negociata rreth projekteve infrastrukturore dhe investimeve.
“Ne po luftojmë që Fondi Amerikan i Zhvillimit të hapë një zyrë në Beograd. Ky do të ishte një sukses i madh për Serbinë dhe po luftojmë gjithashtu që Prishtina të pranojë të ashtuquajturin ‘mini Shengen’”, tha Vuçiç për mediat.
“Zona mini Shengen” është një zonë ekonomike që përfshin Serbinë, Shqipërinë dhe Maqedoninë e Veriut dhe heq disa pengesa tregtare midis tre vendeve.
Këshilltari i Trump për sigurinë kombëtare, Robert O’Brien, tha në Tëitter se dy delegacionet “bënë vërtet progres” të enjten.
“Një raund shumë i mirë diskutimesh këtë pasdite me liderët e Serbisë dhe Kosovës. Ata sot bënë një progres real. Normalizimi ekonomik do të thotë punë për të rinjtë. Bisedimet vazhdojnë nesër”, shkroi O’Brien.
