Policia austriake zbuloi 38 emigrantë, disa prej të cilëve në rrezik të mbyteshin nga mungesa e ajrit, të cilët kishin hyrë në vend të fshehur në një kamion frigoriferik rumun, teksa Rumania raporton një rritje të emigracionit të paligjshëm.
Policia austriake këtë javë raportoi se kishte gjetur në një kamion frigoriferik rumun 38 emigrantëve me kombësi siriane, irakiane dhe turke, përfshirë gjashtë fëmijë, disa prej të cilëve rrezikuan të mbyteshin brenda kamionit dhe morën trajtim mjekësor para se të futeshin në paraburgim me pjesën tjetër të grupit.
Policia të mërkurën i zbuloi emigrantët 30 kilometra nga kufiri me Hungarinë pasi kamioni frigoriferik u detyrua të hapte krahun në autostradë për shkak të britmave dhe thirrjeve të agonisë nga ata që fshiheshin në ndarjen e mbyllur të tij, e cila përdoret për të transportuar mallra të ngrira.
Pesë nga emigrantët u arratisën nga kamioni disa kilometra para kësaj dhe nuk janë gjetur ende nga policia, e cila arrestoi shoferin, një shtetas turk 51-vjeçar, banues në Rumani, nën dyshimin se ai është pjesë e një rrjeti kontrabandimi emigrantësh.
Emigrantët i thanë policisë se ata kishin përdorur rrugë të ndryshme klandestine për të arritur në Rumani, ku ishin sistemuar në një shtëpi të sigurt afër kufirit me Hungarinë dhe ishin futur në kamionin frigoriferik që i çoi në Austri përmes Hungarisë.
Ata thanë se i kishin paguar kontrabandistët deri në 8,000 euro secili për transportin.
Kushtet e emigrantëve në kamion të kujtonin ato 71 emigrantëve të paligjshëm që u gjendën të vdekur në të njëjtën autostradë pasi kaluan kufirin nga Hungaria në një kamion tjetër frigoriferik në gusht 2015.
Në vitin 2018, katër figura kryesore në rrjetin që organizoi kalimin e tyre të paligjshëm në Austri u dënuan me 25 vjet burg në Hungari për kontrabandë qeniesh njerëzore dhe vrasje.
Autoritetet austriake këtë javë thanë se vendi po sheh “një rritje të kontrabandimit të emigrantëve” dhe bëri thirrje për një luftë më të ashpër me mafiet e kontrabandës për të parandaluar raste të tilla.
Disa emigrantë arrijnë në Austri nga Rumania, Hungaria dhe ish-Jugosllavia.
Që në fillim të këtij muaji, policia rumune ka ndaluar 181 emigrantë nga vende si Siria, Turqia dhe Vietnami që u përpoqën të kalonin në mënyrë të paligjshme kufijtë rumunë me Hungarinë dhe Serbinë në grupe të organizuara nga kontrabandistë, disa prej të cilëve janë arrestuar.
