Qeveria shqiptare miratoi një paketë të vockël ndihme financiare për një numër biznesesh me vlerë të përgjithshme prej 1.5 milionë eurosh.
Qeveria shqiptare miratoi një paketë ndihme financiare për bizneset prodhuese që duhet të ruajnë masat e distancimit fizik të punonjësve duke ofruar deri në 4 mijë lekë për çdo punëtor për një total prej 187 milionë lekësh. Paratë pritet t’i përfitojnë drejtpërsëdrejti kompanitë ndërsa qeveria ka urdhëruar publikimin e listës së përfituesve të ndihmës në faqen e internetit të Drejtorisë së Përgjithshme të Tatimeve.
Qeveria ka dhënë deri tani dy paketa ndihmash gjatë ndalimqarkullimit të parë në pranverë me vlerë të përgjithshme prej 3.5% të PBB-së. Aktualisht buxheti i shtetit ka pësuar një rënie të të ardhurave me rreth 300 milionë euro në krahasim me vitin e kaluar si pasojë e krizës së shkaktuar nga pandemia. Ndërsa ekonomia u rikthye me shpejtësi në normalitet pas mbylljes së pranverës, rritja e numrit të infektimeve duket se po sjell një krizë të dytë ekonomike.
