Jakup Krasniqi, zëdhënësi i Ushtrisë Çlirimtare të Kosovës gjatë kohës së luftës dhe ish-kryetar i parlamentit, pretendoi pafajësi për krime lufte para Dhomave të Specializuara të Kosovës në Hagë.
“Deklaroj se jam i pafajshëm”, i tha gjykatësit Jakup Kraqniqi, ish-zëdhënësi i Ushtrisë Çlirimtare të Kosovës, UÇK, i kthyer në politikan, në daljen e tij të parë në Dhomat e Specializuara të Kosovës të hënën.
Krasniqi akuzohet, së bashku me presidentin e dorëhequr së fundmi të Kosovës Hashim Thaçi dhe dy të tjerë, për një seri krimesh lufte dhe krimesh kundër njerëzimit, duke përfshirë ndalime të paligjshme, tortura, vrasje, persekutim dhe zhdukje me forcë nga marsi 1998 deri në shtator 1999.
Aktakuza pretendon se ata ishin pjesë e një “ndërmarrje të përbashkët kriminale” që synonte të merrte kontrollin mbi Kosovën “duke përfshirë kanosjen, keqtrajtimin e paligjshëm, dhunë dhe dëbimi e atyre që konsideroheshin si kundërshtarë”.
Edhe pse kjo ishte një seancë paraprake, gjyqtari r lejoi Krasniqin të paraqiste deklaratën e tij për pafajësi.
Teksa i drejtohej gjykatës, Krasniqi tha se asnjë nga pikat në aktakuzë nuk do të vërtetohej.
“Unë do të sjell fakte konkrete kundër tyre”, tha ai.
“Ndjej që më është bërë një padrejtësi. Nëse diçka në aktakuzë është e vërtetë, atëherë do të ndihesha i turpëruar”, shtoi ai.
Ai u ankua gjithashtu për mënyrën se si u arrestua dhe u dërgua në Hagë javën e kaluar.
“Ju na quani një sipërmarrje e përbashkët kriminale, por unë nuk kam trajtuar kurrë njerëz në jetën time siç u trajtova unë gjatë arrestimit dhe transferimit tim në qendrën e paraburgimit këtu”, tha ai.
Lideri politik i UÇK-së gjatë kohës së luftës, Hashim Thaçi, i cili javën e kaluar dha dorëheqjen si president i Kosovës për t’u përballur me akuzat, do të dalë gjithashtu në gjykatë të hënën.
Krasniqi ishte kryetari i këshillit kombëtar të partisë Nisma Socialdemokrate (NISMA) në kohën e arrestimit të tij më 4 nëntor pas një bastisjeje në shtëpitë e tij në Prishtinë dhe fshatin e tij të lindjes Negrovc.
Të akuzuar gjithashtu në aktakuzë janë ish-kreu i Partisë Demokratike të Kosovës, Kadri Veseli, dhe kreu i grupit parlamentar të Lëvizjes Vetëvendosje, Rexhep Selimi. Të dy do të dalin në gjykatë këtë javë.
Dhomat e Specializuara të Kosovës u krijuan për të gjykuar krime të dyshuara se janë kryer gjatë dhe menjëherë pas luftës në Kosovë nga viti 1998 deri në vitin 2000. Ato janë pjesë e sistemit gjyqësor të Kosovës, por të vendosura në Holandë dhe përbëhen nga staf ndërkombëtar.
Ato u krijuan nën presionin e aleatëve perëndimorë të Kosovës, të cilët druheshin se sistemi i drejtësisë në Kosovë nuk ishte aq i fuqishëm sa të gjykonte çështjet e UÇK-së dhe të mbronte dëshmitarët nga ndërhyrjet.
E ashtuquajtura “Gjykatë Speciale” nuk shihet me sy të mirë nga shqiptarët e Kosovës, të cilët e shohin atë si një fyerje të luftës së UÇK-së për çlirimin nga sundimi serb.
