Shqipëria shënoi një rekord të ri të zymtë me 786 persona të prekur dhe 11 të vdekur nga COVID-19 të enjten, dita e tetë radhazi me rritje të pandërprerë të numrit të infektimeve ndërsa masat kufizuese të deritanishme duket se nuk kanë pasur efekt.
Vetëm një javë më parë, shifra prej 500 të infektuarisht përbënte një rekord negativ për Shqipërinë. Por të enjten më 19 nëntor, rekordi i një jave më parë duket diçka e vogël në krahasim me numrin e të infektuarve të rinj: 786 persona të identifikuar në vetëm 2,600 teste të kryera në laboratorët publikë dhe privatë si dhe 11 persona të vdekur nga komplikimet e shkaktuara nga koronavirusi i ri. Një 51 vjeçar nga Shkodra ishte më i riu mes të 11 viktimave të reja të pandemisë, e cila ka vrarë deri më tani 657 persona. Shqipëria urdhëroi mbajtjen me detyrim të maskave në ambjente të hapura në datë 15 tetor ndërsa urdhëroi ndalimqarkullimi më 9 nëntor dhe ndalimin e mitingjeve elektorale më 17 nëntor.
Aktiviteti ekonomik në vend mbetet i papenguar ndërsa shkollat mbeten të hapura pavarësisht faktit se një numër i konsiderueshëm mësuesish janë infektuar dhe disa prej tyre kanë vdekur.
Kryeministri Edi Rama e ka shpallur më herët idenë e një mbylljeje të dytë kombëtare si një masë që do të kishte pasoja të rënda dhe që duhet shmangur me çdo kusht.