Gjykata vlerësoi të ligjshëm arrestimin e punonjësit të policisë Nevaldo Hajdaraj, i cili pranoi vrasjen dhe i kërkoi ndjesë familjes. Vrasja e të riut është pasuar nga një sërë protestash dhe dorëheqjen e Ministrit të Brendshëm.
Gjyqtarja e Gjykatës së Tiranës Shefkie Demiraj njoftoi të premten se kishte gjetur të ligjshëm arrestimin e punonjësit të policisë Nevaldo Hajdaraj dhe caktoi për të masën e sigurisë arrest me burg.
Hajdaraj, që akuzohet për “vrasje e kryer në kapërcim të kushteve të nevojshme të vetëmbrojtjes”, u paraqit i penduar para gjykatës, ndërsa siç tha gjyqtarja kërkoi praninë në gjyq të familjes së viktimës të cilës i kërkoi ndjesë. Hajdaraj pranoi krimin dhe tha që gjithçka kishte ndodhur shumë shpejt.
Prokurori Ardian Braho, kërkoi sipas gjykatës, vlerësimin e ligjshëm të ndalimit dhe arrest në burg për Hajdaraj.
Avokatët mbrojtës të tij pranuan se arrestimi ishte i ligjshëm, ndërsa thanë se masën e sigurisë ia linin në dorë gjykatës.
Hajdaraj akuzohet se vrau 25-vjeçarin Klodian Rasha. Rasha sipas policisë ishte larguar me vrap kur kishte parë patrullën e cila është vënë në ndjekje të tij. Policia fillimisht pretendoi se ishte dyshuar që viktima kishte qenë i armatosur. Policia po ashtu pretendoi se në një nga rrugicat në të cilën u zhvillua ndjekja u gjet një armë, por nuk ka prova që arma t’i përkiste viktimës.
Vrasja e Rashës solli një valë protestatsh të dhunshme në të gjithë vendin dhe sipas policisë mbi 60 persona janë arrestuar në dy ditë. Ndërkohë të enjten Ministri i Brendshëm Sandër Lleshaj dha dorëheqjen.
