Disa qindra protestues, më së shumti adoleshentë, parakaluan nëpër rrugët e Tiranës mbrëmjen e së shtunës, ndërsa policia i sulmoi me gaz lotsjellës dhe ujë me presion, duke arrestuar disa prej tyre në mënyrë rastësore.
Policia tentoi të shpërndajë grupin e protestuesve të rinj në Tiranë në natën e katërt të protestave të shkaktuara nga vrasja e 25 vjeçarit Klodjan Rasha nga një efektiv policie. Protestuesit u grumbulluan në bulevardin “Dëshmorët e Kombit” dhe vijuan në mënyrë paqësore për te blloku i ministrive para se të hynte në rrugën “Myslym Shyri”.
Forcat speciale të policisë ndoqën protestuesit nëpër rrugën “Myslym Shyri”, ku disa oficerë hodhën me krah dhe me pushkë gaz lotsjellës, ndërsa të rinjtë u fshehën nëpër hyrjet e pallateve, lokale e mjedise të tjera, ku policia i vuri prangat disave prej tyre dhe la të lirë disa të tjerë.
Ky reporter dëgjoi një prej protestuesve duke bërtitur: “Pse po na helmoni?! Ne nuk po ju sulmojmë!”
Protestues të tjerë më në moshë duket se u përpoqën të impresiononin forcat speciale të policisë duke bërtitur pas tyre: “Mbroni fëmijët! Mos i godisni fëmijët!”
Pak më vonë, protestues të tjerë u mblodhën në hyrje të bllokut në kryqëzimin pranë Drejtorisë së Policisë, një numër i kufizuar i të cilëve hodhën gurë apo bënë shkatërrime të tjera. Policia ndërhyri në këtë rast me gaz lotsjellës të bollshëm dhe ujë me presion.
Një drejtues policie urdhëroi përmes radios forcat Shqiponja që të bënin ndalime mes të rinjve, ndërsa furgonë të shumtë të policisë morën drejtimin për të pritur të ndaluarit.
Policia ka njoftuar më herët se së paku 150 protestues ishin ndaluar, nga të cilët, një pjesë janë shpallur të arrestuar, nga protesta e ditës së premte.
Shqipëria mbylli në këtë mënyrë ditën e katërt të trazirave të shkaktuara nga vrasja e Klodjan Rashës, 25 vjeç, nga një oficer policie natën mes 8 dhe 9 dhjetorit. Partia Socialiste dhe kryeministri Edi Rama akuzojnë opozitën si organizatore të dhunës, ndërsa kjo e fundit kritikon qeverinë se është larg realitetit që duket se ka nxjerrë qindra adoleshentë në protesta të përnatshme.
Pyetur nga BIRN, disa nga të rinjtë protestues refuzuan të komentojnë duke argumentuar se kanë frikë. Shumë prej tyre dukshëm kishin frikë nga forcat policore të pozicionuara aty pranë dhe po përpiqeshin të largoheshin nga protesta në mënyrë të fshehtë.
