Në ditën e pestë të protestave të të rinjve kundër dhunës policore, policia përdori ujë me presion dhe gaz lotsjellës në një përballje në kryqëzimin e Drejtorisë së Policisë pasi disa protestues qëlluan me gurë.
Disa qindra protestues, më së shumti të rinj, marshuan në mënyrë kryesisht paqësore për gati dy orë nga Sheshi Skënderbej te kryeministria dhe në Unazë për te Drejtoria e Policisë, duke kërkuar dorëheqjen e Drejtorit të Përgjithshëm të Policisë Ardi Veliu dhe duke sharë kryeministrin Edi Rama.
Protesta përfundoi sërish me gaz lotsjellës, ujë me presion dhe ndalime kur protestuesit u përballën me forcat speciale të policisë te ura pranë Drejtorisë së Policisë, ku së paku një protestues qëlloi me gur makinën e ujit me presion.
Pasi policia përdori ujin, një pjesë e protestuesve të rinj tentuan të bëjnë rezistencë paqësore duke u shtrirë në rrugë. Policia, e cila gjatë ditëve të mëparshme është përgjigjur me dhunë brutale, u duk më e vetëpërmbajtur por gjithsesi një prej protestuesve të rinj që ishte shtrirë në mënyrë pasive në rrugë u shoqërua për në komisariat nga forcat Shqiponja pavarësisht se duket se nuk kishte bërë dhunë.
Protestat e të rinjve kundër policisë u ndezën pesë ditë më parë pasi një oficer policie hapi zjarr dhe vrau një 25 vjeçar të paarmatosur, Klodjan Rashën. Që nga ajo ditë, policia është përpjekur ta trajtojë ngjarjen si një incident i izoluar ndërsa është përballur me akuza për politizim të aktivitetit të saj në shërbim të partisë socialiste në pushtet, për përdorim disproporcional të dhunës dhe për ndalime të të rinjve në mënyrë rastësore, për të mbushur qelitë e komisariateve dhe duke i mbajtur të ndaluarit gjatë të gjithë natës pa gjumë.
Në përballjen e së dielës pranë Drejtorisë së Policisë, ky reporter vërejti se si policët tentuan të ushtrojnë vetëpërmbajtje për të mos përdorur shkopinjtë e gomës, tipar i zakonshëm i netëve të shkuara, ndërsa vijuan të përdorin me bollëk gazin lotsjellës. Një prej policëve raportoi në radio: “Nuk kemi prekur asnjë me dorë”, një reflektim ky ndaj reklamës së keqe që policia ka marrë nga pamjet e forcave speciale që vënë prangat në duart e adoleshentëve të trembur.
Jo vetëm policët ushtruan vetëpërmbajtje të dielën. Të rinjtë protestues treguan kujdes për të ndaluar disa prej tyre që niseshin të bënin vandalizma ndaj sinjalistikës rrugore, tipar i protestave të ditëve të shkuara.
