Këshilli i Emërimeve në Drejtësi i dërgoi Kuvendit raportin dhe pikëzimin për kandidatin e vetëm Altin Binaj, për vakancën në Gjykatën Kushtetuese.
Këshilli i Emërimeve në Drejtësi, KED, i dërgoi Kuvendit raportin dhe pikëzimin për kandidatin e vetëm Altin Binaj, për vakancën në Gjykatën Kushtetuese të shpallur prej Kuvendit sëfundmi në 24 shtator 2020.
“Këshilli i Emërimeve në Drejtësi, pas diskutimeve miratoi vendimin për pikëzimin dhe renditjen e kandidatit të lejuar për vendin vakant në Gjykatën Kushtetuese, vakancë e parakohshme, e shpallur nga Kuvendi i Shqipërisë në datën 28.08.2018 dhe rishpallur në datat 21.08.2019 dhe 24.09.2020, si edhe listën përfundimtare të renditjes së bashku me raportin përkatës. KED po sot, i përcolli këto akte pranë organit të emërtesës, Kuvendit të Republikës së Shqipërisë”, thuhet në njoftimin e KED.
Binaj e ka filluar karrierën në institucionin e Prokurorisë në Shqipëri në mesin e viteve ’90 dhe ka qenë prokuror në Vlorë dhe drejtues i prokurorisë atje për disa vite. Në vitin 2013, prokurori Altin Binaj u emërua në Prokurorinë e Përgjithshme, ku kryesoi drejtorinë e hetimit të korrupsionit. Prej vitit 2016, Binaj drejton Prokurorinë e Apelit të Vlorës.
Ndëkohë në një garë të ngjashme të shpallur nga Presidenti i Republikës KED ka lejuar kandidimin dhe pritet të bëjë pikëzimin për tre kandidatë. Në listë është sërish prokurori Binaj, avokati Përparim Kalo dhe drejtori i kabinetit i Gjykatës Kushtetuese Aleksandër Toma. Për vakancën e dytë të shpallur nga Presidenti i Republikës në garë është vetëm juristja Sonila Bejtja.
Lista që i dërgohet Kuvendit duhej të kishte 3 kandidatë, por pas dy vjetësh shpalljesh e rishpalljesh në garë është kualifikuar vetëm Binaj. Është e paqartë se si do të procedohet prej këtu. Por nëse Binaj zgjidhet, ai do të bëhëj anëtari i 5 i Gjykatës Kushtetuese, e cila deri tani ka katër anëtarë. Për vënien në funksionalitet të gjykatës, e cila është jashtë funksionit prej tre vjetësh pas largimit prej vetingut të anëtarëve të saj, do duhet të zgjidhet edhe të paktën një anëtar nga vakancat e shpallura nga Presidenti i Republikës.
Ambasadorja e SHBA në Tiranë Yuri Kim, e cila ka bërë thirrje për vënien në funskion të gjykatës para fundit të dhjetorit, përshendeti vendimin e KED, ndërsa tha se me miratimin edhe të listës për vakancën e Presidentit të Republikës, Gjykata Kushtetuese do bëhej shumë shpejt funksionale. “Kjo do të thotë që Shqipëria do të ketë këtë javë një nga dy gjyqtarët e nevojshëm për një gjykatë funksionale. Sapo Presidenca të emërojë gjyqtarin e saj, Gjykata Kushtetuese do të jetë funksionale”, shkroi ambasadorja nw Twitter.
