17 persona janë arrestuar në Belgjikë dhe Gjermani, ndërsa janë kapur qindra kilogramë kokainë. Policia shqiptare njoftoi se në bashkëpunim me kolegët kishte kryer kontrolle në shtëpitë e të arrestuarve dhe po ashtu nga SPAK ka nisur hetimi pasuror i tyre.
Qindra kilogramë kokainë është kapur prej policive në Gjermani dhe Belgjikë prej vitit 2017 dhe që pretendohet se i përkiste një grupi të drejtuar nga një 34-vjeçar nga Shqipëria dhe një 35 vjeçar nga Lituani. Të dy u arrestuan në një seri aksionesh policore në datat 15 deri në 21 dhjetor.
Policia e Shtetit njoftoi nga ana e saj se ka qenë pjesë e hetimeve dhe se nën drejtimin e Strukturës së Posaçme Kundër Korrupsionit dhe Krimit të Organizuar, ka ushtruar kontrolle në shtëpitë e të ndaluarve në Belgjikë dhe se ndaj tyre ka nisur ndërkohë një hetim pasuror.
Sipas një burimi nga Policia e Shtetit ndër të arrestuarit janë Musa Gjikola, 34 vjeç dhe Genti Balliu, alias Fatmir Balliu, 37 vjeç, banues në Tiranë, Ramazan Rraja, 27 vjeç dhe Fioralb Rraja, 24 vjeç, banues në Nikël, Fushë Krujë; Bledar Pepaj, 29 vjeç, banues në Pukë dhe Fatmir Xhecuka, 33 vjeç, banues në Laç. Po ashtu të arrestuar janë edhe një shtetas lituanez dhe një me shtetësi greke.
Ndër të arrestuarit Ramazan Rraja është më i njohur në shqipëri. Ai është nipi i deputetit socialist Rrahman Rraja dhe më herët është ndaluar për ushtrim dhune në publik ndaj një gruaje. Skena u filmua dhe u denoncua publikisht në hyrje të Qendrës Shëndetësore “Nënë Tereza”. Rraja po ashtu u përmend si kërcënuesi në denoncimin e një ish-punonjësi policie që u arratis nga vendi, pasi pretendoi se ishte kërcënuar pas hetimeve për djalin e deputetit i cili u dënua për ushtrim dhune ndaj një vajze në Krujë. Deputeti Rraja nuk ka reaguar pas lajmit.
“Në kuadër të operacionit “ATOS”, në periudha të ndryshme gjatë vitit 2019 dhe vitit 2020 janë sekuestruar nga policia belge, në bashkëpunim me policinë shqiptare, rreth 232 kilogramë kokainë, një armë zjarri pistoletë, si dhe rreth 200 mijë euro”, thuhet në njoftimin e policisë shqiptare.
Në një njoftim të policisë gjermane të Landit të Bavarisë bëhet me dije se grupi i drejtuar nga një shqiptar dhe një lituanez sillte drogën nga Ekuadori përmes transportit të bananeve. Në vitin 2017 arkat e bananeve me rreth 200 kilogramë drogë iu zbuluan rastësisht në 10 supermarkete në Gjermani thuhet në njoftimin e policisë gjermane.
Ndërkohë policia shqiptare pretendon se kontenierët e bananeve në të cilët vendosej droga pajiseshin me GPS dhe se “trafikantët, për të mos u identifikuar dhe zbuluar, organizonin vjedhje me armë të lëndës narkotike nga magazinat ose dhomat e pjekjes së bananeve”.