Duke deklaruar se nuk ka ambicie të bëhet deputet në Kuvendin e Shqipërisë, 30 vjeçari Gent Cakaj njoftoi dorëheqjen nga posti i Ministrit të Jashtëm në detyrë të martën. Rama deklaroi se ai do të zëvendësohet nga Olta Xhaçka, aktualisht Ministre e Mbrojtjes, e cila nga ana e saj do të zëvendësohet nga Niko Peleshi.
Ministri i Jashtëm në detyrë Gent Cakaj dha dorëheqjen të martëm përmes një statusi në Facebook, në të cilin nuk i kurseu lavdërimet për veten dhe falënderimet për kryeministrin Edi Rama ndërsa nënvijëzoi se dorëheqja vjen për shkak se ai nuk ka në plan të angazhohet në fushatën zgjedhore për zgjedhjet parlamentare të 25 prillit 2021.
Cakaj u bë ministër i jashtëm në janar 2019 pasi Rama shkarkoi shtatë ministra në përmbyllje të protestave studentore të dhjetorit 2018, të cilat vunë në dukje hendekun në zgjerim mes qeverisë së tij dhe realitetit me të cilin përballen qytetarët.
Cakaj, i cili është njëkohësisht shtetas i Kosovës, u prezantua nga Rama si një njeri që lexon shumë libra ndërsa u bë i njohur në publik për fjalime të stilit Hajdegerian, me fjalë të mëdha të krijuara për herë të parë, kuptimi i të cilave nuk u shpjegua.
Ndonëse fjalët e mëdha u lanë jashtë deklaratës së dorëheqjes, Cakaj deklaroi se puna e tij kishte qenë “shumë e suksesshme” ose “e jashtëzakonshme” ose “e pashembullt” ndërsa për Ramën ofroi “mirënjohje dhe falënderim”.
“Pas përfundimit me shumë sukses të kryesisë së OSBE-së, hapjes së negociatave për anëtarësim me BE-në, punës së jashtëzakonshme për të siguruar një ulëse në Këshillin e Sigurimit për 2022-2023, zbatimit të një sërë masash të pashembullta për ngritjen e faktorit shqiptar në Ballkanin Perëndimor, si dhe duke qenë se Shqipëria është në pragfushatë zgjedhore, ku unë nuk synoj të angazhohem si kandidat për deputet, konsideroj që kapitulli i shërbimit tim në krye të diplomacisë shqiptare është i përfunduar,” deklaroi Cakaj.
“…shërbimi ndaj jush ka qenë nderi më i madh i jetës sime!” shtoi ai.
Olta Xhaçka, 41 vjeç, u bë deputete e Partisë Socialiste në vitin 2009 si përfaqësuese e Korçës dhe pastaj më 2017 si përfaqësuese e Tiranës. Ajo ka qenë ministre e mbrojtjes që nga viti 2017.
Niko Peleshi ka qenë kryebashkiak i Korçës dhe zëvendëskryeministër mes viteve 2017 dhe 2019.