Me pothuajse të gjitha votat e numëruara tashmë, kreu i partisë triumfuese Vetëvendosje, Albin Kurti, tha se ai planifikonte ta bënte Kosovën një “vend të mirë për të jetuar”, ndërsa rivalët e tij u zotuan se do të jenë konstruktivë në opozitë.
Liderët politikë në Kosovë kanë pranuar fitoren e madhe të Lëvizjes Vetëvendosje në zgjedhjet e parakohshme parlamentare të së dielës, me disa që thonë se marrin përsipër përgjegjësinë për rezultatet e dobëta të partive të tyre.
Deri të hënën në mëngjes, Komisioni Qendror i Zgjedhjeve, KQZ, kishte numëruar rreth 98.62 për qind të votave, me Vetëvendosjen të dilte e para me 48.16 për qind, Partinë Demokratike të Kosovës, PDK, e dyta me 17.31 për qind dhe Lidhjen Demokratike të Kosovës, LDK, e treta me 13.15 për qind. Aleanca për Ardhmërinë e Kosovës, AAK, mori rreth 7.43 për qind të votave.
Albin Kurti, kreu i Vetëvendosjes dhe kandidati i partisë për postin e kryeministrit, tha se rezultati tregonte pretendimin e tij gjatë fushatës se zgjedhjet ishin një “referendum” për atë që ai e quajti “kapje e shtetit”.
“Rruga përpara është e gjatë. Do të kemi pengesa dhe mund të bëjmë disa gabime, por kemi një kauzë fisnike. Ne nuk do të hakmerremi për askënd, por do të kërkojmë drejtësi”, tha ai.
“Secili dhe secili prej nesh duhet të jetë përgjegjës për ta bërë vendin tonë një vend të mirë për të jetuar”, shtoi Kurti, i cili garoi në zgjedhje si kandidat për deputet pavarësisht një vendimi të Gjykatës Kushtetuese të vitit 2020 që e ndalon atë ta bëjë këtë, duke qenë se ai ka një dënim penal.
Duke theksuar koalicionin e tij aktual me presidenten e përkohshme të Kosovës dhe ish-anëtare të LDK-së, Vjosa Osmani, Kurti tha se rezultati konfirmon se ata nuk kanë nevojë të formojnë koalicione shtesë me partitë e tjera, të cilat, sipas tij, “duhet të reformohen në opozitë”.
Osmani, e cila u vendos numri dy në listën e deputetëve të Vetëvendosjes, tha se fitorja bindëse e listës së tyre të përbashkët duhet “të shërbejë si një mësim i mirë që fjala e dhënë për njerëzit nuk duhet të thyhet”, duke iu referuar ish partisë së saj, LDK.
Kreu i LDK-së, Isa Mustafa, ndërkohë u zotua të kryejë një analizë të plotë të rezultatit zgjedhor, për të “bërë ndryshimet e nevojshme” brenda partisë së tij dhe “për të rindërtuar vizionin e saj Rugovian për vendin”.
Mustafa tha se ai i respektonte rezultatet e zgjedhjeve, ndërsa vlerësoi kryeministrin në largim Avdullah Hoti. Nga ana e tij, Hoti, kandidati i LDK-së për kryeministër, tha se ai merrte përsipër “përgjegjësinë e plotë për rezultatet”.
Enver Hoxhaj, kreu i përkohshëm dhe kandidati për kryeministër për Partinë Demokratike të Kosovës, PDK, gjithashtu tha se ai pranonte vendimin e njerëzve.
“Rezultatet e renditën Lëvizjen Vetëvendosje në vendin e parë, e ndjekur nga PDK-ja në vendin e dytë. Unë dua ta përgëzoj Vetëvendosjen për rezultatet dhe t’i bëj thirrje që të punojnë dhe forcojnë shtetin e Kosovës”, tha Hoxhaj, duke u zotuar se PDK-ja do të ishte një faktor stabiliteti.
Ramush Haradinaj, ish-presidenti i Kosovës dhe kreu i AAK-së, gjithashtu uroi Vetëvendosjen, pasi rezultate të ndryshme sondazhesh parashikuan fitoren e saj të mundshme.
Vetëvendosje gjithashtu mori urime nga rajoni.
Kreu i partisë kryesore opozitare të Shqipërisë, Partia Demokratike, PD, Lulzim Basha, tha se ai ishte “i sigurt se partia fituese dhe partitë e tjera do të arrijnë të adresojnë çështjet kryesore dhe t’i zgjidhin ato për të mirën e popullit të Kosovës”.
Ali Ahmeti, udhëheqësi i partisë kryesore etnike shqiptare në Maqedoninë e Veriut, Bashkimi Demokratik për Integrim, BDI, gjithashtu uroi kreun e Vetëvendosjes, duke thënë se ai dhe partia e tij do të mbeten një “vëlla, aleat dhe mbështetës … si dhe partner dhe bashkëpunëtor”.
Një deputet etnik shqiptar në parlamentin e Serbisë, Shaip Kamberi, gjithashtu përshëndeti zgjedhjet dhe rezultatin e tyre, duke thënë se Kosova kishte treguar se ka edhe kapacitete demokratike dhe institucione funksionale.
