Të afërmit e viktimës dhe autorit 25-vjeçar akuzojnë autoritetet lokale dhe policinë se nuk e kishin ndihmuar familjen, e cila jetonte në skamje dhe kishte nevojë për ndihmë mjekësore.
Një 25-vjeçar vrau të atin mesditën e të premtes në Luar të Roskovecit. Policia njoftoi se kishte arrestuar Erdis Rrapaj, si të dyshuar për vrasjen e Dhori Rrapaj. Motivet e ngjarjes dhe rrethanat janë të paqarta.
Por të afërm të familjes akuzuan bashkinë dhe policinë se kishin neglizhuar më herët thirrjet e tyre për të ndihmuar viktimën dhe autorin që jetonin në skamje dhe vuanin nga probleme të shëndetit mendor. Të afërmit thanë se babë e birë kishin nevojë për mjekim, të cilin nuk e blinin dot.
“Kemi vajtur në bashki e polici, kërkuam t’i ndihmojmë sepse ata kishin probleme, nuk merrnin dot ilaçet,” tha Parashqevi Rrapaj, kunata e viktimës.
“Polica na tha pse me ata do merremi ne gjithmonë, në bashki s’na dhanë asnjë përgjigje dhe asnjë ndihmë,” shtoi ajo.
Fqinjët thonë se babë e bir merrnin një ndihmë sociale prej 3 mijë lekësh, por ajo nuk mjaftonte për të jetuar dhe për të blerë medikamentet.
“Me lekët e asistencës paguanin dritat, nuk dilnin për ilaçe,” tha një prej tyre.
Të afërmit thonë se 25 vjeçari, i cili ishte shtruar disa herë në Spitalin Psikiatrik në Vlorë, kishte shkuar të premten të kërkonte një rekomandim në Qendrën Shëndetësore për tu shtruar në spital, por nuk e kishte marrë.
Më pas ai është kthyer në shtëpi. Në mesditë ai ka njoftuar gruan e xhaxhait se kishte vrarë të atin dhe kjo e fundit ka njoftuar policinë.
