Meliza Haradinaj-Stublla dha dorëheqjen si ministre e jashtme dhe u largua nga partia Aleanca për Ardhmërinë e Kosovës pasi mediat publikuan akuza se bashkëshorti i saj u kishte dhënë ryshfet komisionerëve zgjedhorë për ta ndihmuar atë të fitonte një vend në parlament.
Meliza Haradinaj-Stublla njoftoi të martën se po tërhiqet nga pozicioni i saj si ministre e jashtme e Kosovës dhe po i jep fund anëtarësimit të saj në Aleancën për Ardhmërinë e Kosovës.
Haradinaj-Stublla dha dorëheqjen pas raportimit të dielën për manipulim të votave nga faqja e internetit Insajderi, e cila pretendoi se burri i saj, Dardan Stublla, u dha ryshfet komisionerëve të zgjedhjeve për ta ndihmuar atë të fitonte një vend në Asamblenë e Kosovës në zgjedhjet parlamentare muajin e kaluar.
Insajderi gjithashtu publikoi një regjistrim të një bisede midis Stubllës dhe një komisioneri zgjedhor.
Në një postim në Facebook ku njoftoi dorëheqjen e saj, Haradinaj-Stublla kërkoi nga Zyra e Prokurorit të Shtetit të hedhë dritë mbi vërtetësinë e regjistrimit dhe akuzave kundër saj sa më shpejt të jetë e mundur.
Ajo deklaroi se vendimi i saj për të dhënë dorëheqjen ishte një “detyrim moral” dhe jo për shkak të ndonjë përgjegjësie “për manipulimet dhe akuzat që janë ngritur pa mëshirë ndaj meje”.
Ajo tha gjithashtu se kishte ngritur padi për shpifje dhe shantazh.
Haradinaj-Stublla ishte ministre e jashtme në qeverinë në largim të udhëhequr nga Avdullah Hoti, e cila u rrëzua në dhjetor të vitit të kaluar kur Gjykata Kushtetuese e Kosovës vendosi se kjo qeveri ishte e paligjshme sepse ishte votuar me ndihmën e një vote të pavlefshme të hedhur nga një deputet që kishte një dënim penal.
Ajo ishte pothuajse e sigurt që do të zëvendësohej në administratën e re e cila do të vijë në detyrë së shpejti pas zgjedhjeve që u mbajtën muajin e kaluar dhe që u fituan nga Lëvizja Vetëvendosje.
Të hënën, kreu i AAK-së Ramush Haradinaj bëri thirrje për një hetim mbi çdo parregullsi të dyshuar elektorale.
“Manipuluesve, kushdo qofshin ata dhe për çfarëdolloj interesi, u uroj dënimet që meritojnë”, tha ai.
Në deklaratën e saj të dorëheqjes, Haradinaj-Stublla e përshkroi largimin nga AAK-ja si diçka “që nuk e mendoja kurrë se do të ndodhte”.
Por ajo shtoi se ishte ” jam në paqe që po largohem nga prezenca toksike e disa njerëzve që AAK-në e bëjnë parti të pareformueshme, dhe kryetarin Haradinaj të izoluar”.
Haradinaj-Stublla më parë ka shërbyer si këshilltare e Ramush Haradinajt gjatë kohës së tij si kryeministër midis vitit 2017 dhe 2019. Ajo u emërua ministre e jashtme më 3 qershor 2020.
Në zgjedhjet e 14 shkurtit, AAK-ja fitoi shtatë për qind të votave dhe do të ketë tetë deputetë në parlament.
