Këshilli i Lartë i Prokurorisë, me shumicë votash, ka vendosur të pranojë kërkesën e ILD për largimin nga detyra të prokurorit të Krujës, Bujar Memia për shkak të qëndrimit të tij pasiv ndaj vendimeve të gjykatës për lirimet me kusht.
Këshilli i Lartë Prokurorisë, KLP njoftoi të mërkurën vendimin për shkarkimin nga detyra të prokurorit të Krujës, Bujar Memia. Ishte Inspektori i Lartë i Drejtësisë, ILD që i kërkoi KLP-së shkarkimin e Memisë, për shkak të qëndrimit të tij pasiv ndaj vendimeve të gjykatës për lirimin me kusht të të dënuarve për vepra të rënda penale, Ilir Paja dhe Hekuran Billa. Ky i fundit u ekzekutua pak kohë pas lirimit, më 11 qershor të 2020-ës.
Në njoftim thuhet se 10 anëtarë të Këshillit kanë votuar pro shkarkimit të Memisë, ndërsa ka qenë kundër anëtarja Nurihan Seiti.
Për këto vendime lirimi me kusht, KLGj vendosi më 17 mars shkarkimin nga detyra të gjyqtares së Krujës Enkeleida Hoxha.
Sipas ILD, prokurori Memia, në mënyrë të pajustifikuar, nuk ka përmbushur detyrën gjatë dhe pas gjykimit, që kanë sjellë përfitim të padrejtë dhe në kundërshtim me ligjin për palët në proces. Gjithashtu, ILD konstaton se mosankimi ka pasjellë pamundësinë e ushtrimit të kontrollit gjyqësor. Veprimet dhe mosveprimet e prokurorit Memia u konsideruan të vullnetshme, të pajustifikuara dhe të vazhduara në katër procese gjyqësore.
Kërkesa e ILD u kundërshtua nga prokurori Memia dhe përfaqësuesit e tij ligjorë, të cilët ndër të tjera sollën në vëmendje të Këshillit se vendimet për lirimet e të dënuarve nuk kishin sjellë pasoja pasi ata nuk kishin kryer asnjë veprim të paligjshëm, si dhe theksuan se qëllimi i dënimit është rehabilitimi dhe ri integrimi në shoqëri.
