Policia e Shtetit ka arrestuar një të dyshuar dhe ka sekuestruar 49 kilogramë kokainë në portin e Durrësit, e zbuluar në një konteiner me origjinë nga Ekuadori.
Policia e Shtetit njoftoi të enjten se ka arrestuar një të dyshuar dhe ka sekuestruar 49 kilogramë kokainë në portin e Durrësit.
“Strukturat e Policisë së Shtetit, në vijim të punës për parandalimin, evidentimin dhe goditjen e trafikimit të lëndëve narkotike, bazuar në informacionet e marra në rrugë operative dhe hetimet e kryera se në një kontenier fshihej një sasi e konsiderueshme lënde narkotike kokainë, në bashkëpunim me autoritetet doganore kanë organizuar dhe finalizuar operacionin policor të koduar “MERSIN”,” tha Policia e Shtetit.
“Si rezultat i operacionit, gjatë kontrollit të imtësishëm të ushtruar në disa kontenierë, u bë e mundur që në njërin prej tyre, i cili ishte i ngarkuar me banane dhe ishte nisur nga Ekuadori me destinacion Shqipërinë, për llogari të një firme me qendër në Maminas, me administrator shtetasin S. Ç., të gjendej dhe sekuestrohej në cilësinë e provës materiale rreth 49 kilogramë lëndë narkotike e dyshuar koka,” shtoi njoftimi.
Ky nuk është rasti i parë që në portin e Durrësit sekuestrohet kokainë e trafikuar nga Ekuadori. Droga dyshohet se i përket kartelit shqiptar të kokainës të njohur si ‘Kompania Bello”, i cili drejtohet nga Dritan Rexhepi, një trafikant shqiptar i burgosur në Ekuador.
Ky kartel përbëhej nga 14 organizata kriminale, të cilat kanë krijuar një strukturë organizimi të nivelit superior – një lloj federate të krimit transnacional, e cila ka qëllim të përfitojë dhe të ndajë shërbime të përbashkëta, që mundësojnë trafikimin dhe shpërndarjen e drogës dhe forcimin e entiteteve përbërëse.
Për më shumë lexo:
Brenda kartelit të parë shqiptar të trafikimit ndërkombëtar të kokainës
