Plagosja e një burri në zyrën e Partisë Demokratike në Kavajë të hënën në mbrëmje shkaktoi akuza politike përpara zgjedhjeve parlamentare që do të mbahen në fundjavë.
Në prag të votimeve që do të mbahen këtë fundjavë, në Shqipëri u rritën tensionet kur një i ri u qëllua në gju brenda zyrës elektorale të Partisë Demokratike në qytetin e Kavajës në orët e vona të së hënës.
Partia Demokratike tha se ky ishte një sulm ndaj vetë partisë, por kryeministri Edi Rama, kreu i Partisë Socialiste në pushtet, tha se incidenti po përdorej për qëllime politike.
Presidenti Ilir Meta shkoi në vendin e ngjarjes dhe më pas vizitoi të plagosurin në spitalin e Durrësit, ku ai po merr trajtimin e nevojshëm mjekësor.
Policia e shtetit tha në një deklaratë se autori i sulmit është ende i lirë dhe po kërkohet nga oficerët e policisë.
Kreu i Partisë Demokratike Lulzim Basha tha në një takim elektoral në Kavajë të martën se Rama ishte fajtor për “sulmin ndaj sekretarit të Partisë Demokratike brenda zyrës së partisë”.
Basha tha se Partia Demokratike nuk do të dekurajohet nga “sulmi frikacak”.
“Përkundrazi, ne jemi më të vendosur se kurrë, më të fortë se kurrë, ne jemi më të bashkuar se kurrë për t'i dhënë shqiptarëve fitoren më të madhe”, tha ai.
Rama reagoi në Twitter, duke shkruar se plagosja në Kavajë “nuk ishte e motivuar politikisht”.
“Është krejt e qartë që ngjarja e Kavajës s'ka asnjë motiv politik! Autori s'ka asnjë lidhje me PS, përkundrazi është militant i PD! PD s'ka faj për ngjarjen po për politizimin skandaloz!”, shkroi Rama.
Në një incident të veçantë në qytetin e Beratit të hënën në mbrëmje, një anëtar i Partisë Demokratike filmoi atë që ai tha se ishte një furgon me pako ndihmash që ai pretendoi se bashkia e Beratit po ua shpërndante familjeve të varfra në mënyrë që të blinin votat e tyre për partinë në pushtet.
“Pushteti nuk mund të mbahet duke blerë të varfrit. Në kulmin e fushatës elektorale, bashkia e Beratit po shpërndan pako për familjet e varfra në këmbim të votave”, shkroi Alizoti në Facebook.
Mediat lokale raportuan se shoferi i furgonit dhe një punëtor i bashkisë u morën në pyetje nga prokuroria për incidentin.
Partia Socialiste ka qenë në pushtet që kur fitoi zgjedhjet në 2013 dhe mundi përsëri Partinë Demokratike të qendrës së djathtë në vitin 2017.
