Një grua u vra nga bashkëshorti pranë Gjykatës së Elbasanit, ndërsa avokati i viktimës dhe një kalimtar u plagosën. Autori i dyshuar u arrestua pak minuta pas ngjarjes së rëndë.
Koçi Buzo 58 vjeç, u arrestua të enjten nga policia vetëm pak minuta pasi dyshohet se vrau me kallashnikov bashkëshorten e tij Liljana Buzo 54 vjeç. Policia e Elbasanit njoftoi se nga të shtënat me armë mbeti i plagosur edhe avokati i viktimës Gëzim Toçila dhe një kalimtar i rastit.
Ngjarja ndodhi mesditën e së enjtes rreth 100 metra nga godina e Gjykatës së Elbasanit, në rrugën mes këtij institucioni dhe Drejtorisë së Policisë së Qarkut.
Viktima u transportua menjëherë drejt spitalit kirurgjik, por gjendja e saj ishte e rëndë dhe ajo u nda nga jeta pa mbërritur në spital. Ndërkohë avokati Gëzim Toçila mori një plumb në këmbë, ndërsa kalimtari mbeti i plagosur në dorë. Ata iu nënshtruan ndërhyrjes kirurgjikale dhe ndodhen jashtë rrezikut për jetën.
BIRN mësoi nga dëshmitarë se ngjarja ka ndodhur menjëherë pas përfundimit të një seance gjyqësore divorci mes bashkëshortëve Buzo. Dëshmitarët thanë se viktima pas seancës ka qenë e shoqëruar nga avokati Gëzim Toçila dhe njëri nga djemtë. Autori i dyshuar Koço Buzo i ka ndjekur nga pas duke qëlluar me breshëri automatiku gruan 54 vjeçare.
Dëshmitarë okularë thanë se autori i dyshuar u çarmatos nga një burrë rreth 60 vjeç, pronar i një rrobaqepësie në rrugën ku ndodhi ngjarja. Policia konfirmoi për BIRN se i dyshuari ishte ndaluar fillimisht nga banori i lagjes që e ka çarmatosur.
58 vjeçari ka tentuar të largohet në rrugicat e lagjes, por është kapur në një kohë të shkurtër nga policia. Më parë ai ka qenë efektiv i policisë dhe vitet e fundit punonte si roje private pranë një kompanie sigurie. Çifti ka tre fëmijë në moshë të rritur.
Dhuna në familje që përshkallëzon në krime të rënda mbetet një prej krimeve më shqetësuese në vend. BIRN ka gjetur në një sërë shkrimesh të mëparshme që institucionet e drejtësisë dhe të tjerë të ngarkuar me ligj kanë dështuar në vijim të ofrojnë mbrojtje efektive për viktimat e dhunës në familje, duke sjellë shpesh krime si ai i të enjtes në Elbasan.
