Një 29 vjeçar u plagos gjatë një operacioni të policisë në Fier kundër kanabisit. I riu sipas policisë u gjet i armatosur pranë një parcele me fidanë të kanabisit, ndërsa refuzoi të hidhte armën.
Banorët e fshatit Gjorgoz në Patos panë mëngjesin e të hënës se si dhjetëra forca të policisë zbarkuan në fshatin e tyre. Policia rrethoi një zonë që njihet si “Përroi i Murtajës”, prej nga pak minuta më vonë u dëgjuan edhe të shtëna armësh.
Policia e Fierit njoftoi më vonë se një 29-vjeçar i identifikuar si Griseld Shpataraku u plagos në përballje me forcat e rendit ndërsa u gjet i armatosur pranë një zone të mbjellë me fidanë të kanabisit.
Policia tha se një nga punonjësit e saj kishte qëlluar Shpatarakun, pasi ky kishte refuzuar të hidhte kallashnikovin që mbante dhe ua kishte drejtuar atë oficerëve.
Në njoftimin zyrtar për shtyp policia tha se 29-vjeçari tentoi të mbushë armën kur pa policinë dhe nuk iu bind thirrjeve për ta hedhur atë.
Banorët thanë se ishin frikësuar nga prania e personave të armatosur që ruanin parcelat. “Ne nuk kemi patur raste të tilla këtu në fshat, ama atje në atë zonë shkojmë për dru dhe mund të më qëllonte të përballesha unë më atë që mbante kallashin në dorë”, tha një banor shtëpia e të cilit ndodhet pranë vendit ku ndodhi përplasja e policisë me të riun.
I plagosuri u dërgua në spitalin e Fierit ku mjekët konstatuan një plagë plumbi në shpatull nga e cila nuk i rrezikohet jeta.
Policia njoftoi po ashtu gjetjen e fidanëve të kanabisit. “Nga këqyrja e vendit të ngjarjes rezultoi se në afërsi të vendit ku u konstatua shtetasi me armë kishte dhe fidanë cannabis sativa të kultivuar në kubikë”, thuhet në njoftimin e policisë.
Policia njoftoi se po vazhdon kërkimet në zonë ndërsa pritet të marrë në pyetje 29-vjeçarin. Ndërkohë një hetim i brendshëm për rrethanat e ngjarjes ka nisur nga SHÇBA.
