Gjyqtari i Apelit të Durrësit, Desart Avdulaj do të përballet të premten me Komisionin e Pavarur të Kualifikimit. Si ka ndryshuar pasuria e tij familjare nga viti 2003 deri në fund të vitit 2017.Gjyqtari Desart Avdulaj i Gjykatës së Apelit të Durrësit do të përballet të premten më 21 maj me Komisionin e Pavarur të Kualifikimit. Trupa gjyqësore që po kryen procesin e tij të vetingut përbëhet nga Roland Ilia, Brunilda Bekteshi dhe Xhensila Pine.
Desart Avdulaj ka përfunduar studimet në Shkollën e Magjistraturës në vitin 2004 dhe pas një periudhe stazhi në Gjykatën e Durrësit, u emërua gjyqtar në Gjykatën e Gjirokastrës. Prej vitit 2013, ai e ushtron funksionin në Gjykatën e Apelit të Durrësit.
Analiza e pasurisë është një ndër tre shtyllat e rivlerësimit për gjyqtarët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet ndryshimin e pasurisë së deklaruar nga gjyqtari Desart Avdulaj nga viti 2003 deri në fund të vitit 2017. [Kliko për skedën në PDF]
Në deklarimin për herë të parë në vitin 2003, gjyqtari Desart Avdulaj nuk zotëronte asnjë pasuri, ndërsa në fund të vitit 2017, pasuria familjare kap vlerën e 18.5 milionë lekëve, duke shënuar një rritje mesatare vjetore prej 1.3 milionë lekësh.
Ai zotëron familjarisht pasuri të patundshme me vlerë 15.3 milionë lekë, likujditete bankare prej 703 mijë lekësh, kursime në cash prej 600 mijë lekësh si dhe një automjet me vlerë 420 mijë lekë.
Të ardhurat familjare për periudhën deklaruese janë 21.7 milionë lekë, nga të cilat 65% e totalit burojnë nga paga dhe mësimdhënia e Z.Avdulaj, 27% nga të ardhurat e bashkëshortes dhe gati 6% nga dhuratat në cash.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrolli aritmetik/logjik për 14 vite të deklarimit, asnjë prej deklaratave nuk rezultoi me probleme.
Nga analiza cilësore e deklaratave të pasurisë, BIRN identifikoi si “flamuj të kuq” huatë e marra për blerjen e një apartamenti si dhe përdorimin e kursimeve cash në shtëpi për kryerjen e investimeve.
Në vitin 2015, subjekti Desart Avdulaj deklaron shtesë aseti, apartament banimi në Tiranë me sipërfaqe 169.8 m2, me vlerë 101,880 euro. Si burim financimi për këtë aset rezultojnë 4 kontrata huamarrje pa interes ndaj personave fizikë në vlerën 50,000 euro dhe 15,000 Paund, ndërsa diferenca është plotësuar përmes kursimeve në gjendje cash, të akumuluara deri në atë moment në shtëpi.
Në vitin 2017, subjekti deklaron gjithashtu blerje garazhi në vlerë 10,000 euro dhe sistem kondicionimi në banesë me vlerë 1,367,800 lekë, me burim financimi gjendjen cash të akumuluar dhe të mbajtur në shtëpi.
Në vitin 2017, ai deklaron gjithashtu se ka shlyer huatë në vlerë 40,000 euro dhe 15,000 Paund që shërbyen për blerjen e apartamentit, me burim një kredi bankare në vlerën 60,000 euro.
Deklarata e pasurisë së vitit 2003
Deklarata e pasurisë së vitit 2004
Deklarata e pasurisë së vitit 2005
Deklarata e pasurisë së vitit 2006
Deklarata e pasurisë së vitit 2007
Deklarata e pasurisë së vitit 2008
Deklarata e pasurisë së vitit 2009
Deklarata e pasurisë së vitit 2010
Deklarata e pasurisë së vitit 2011
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata e pasurisë së vitit 2015
Deklarata e pasurisë së vitit 2016
Deklarata e pasurisë së vitit 2017
Për më shumë dokumente vizitoni databazën tonë dokumente.reporter.al
