Rovena Voda akuzohet se ushtroi ndikim të paligjshëm për punësim në administratë në këmbim të ryshfetit. Në arrest shtëpie u lanë edhe Majlinda Hasani e Florida Beu.
Gjykata e Posaçme e Shkallës së Parë për Korrupsionin dhe Krimin e Organizuar vendosi të enjten të lërë në fuqi masat e sigurisë “arrest shtëpie” të caktuara të martën më 13 korrik ndaj ish-zëvendës ministres së së Brendshme, Rovena Voda dhe dy shtetaseve Majlinda Hasani dhe Florida Beu, të akuzuara për veprën penale “Ushtrimi i ndikimit të paligjshëm ndaj personave që ushtrojnë funksione publike”, e kryer në bashkëpunim.
Në vendimin për caktimin e masës së sigurisë thuhet se tentativa për të emëruar si specialiste në Ministrisë e brendëshme shtetasen Florida Beu kundrejt përfitimeve monetare dhe materiale është konstatuar gjatë përgjimeve telefonike të realizuara për një procedim penal të regjistruar në vitin 2019 për një tjetër vepër penale.
Nga verifikimi i komunikimeve mes shtetaseve Majlinda Hasani dhe Florida Beu është konstatuar se ato kanë realizuar një takim me Vodën në shkurt të vitit 2020. Hasani i ka kërkuar Vodës që t’i sigurojë një vend të mirë pune për Florida Beun dhe është dakordësuar që fillimisht ta “rregullonte” si specialiste.
Nga hetimet ka rezultuar se Hasani dhe Beu janë takuar sërish me Vodën dhe i kanë dhënë asaj 1000 euro, një aparat telefoni celular dhe më pas një arkë me peshk.
Mbrëmjen e 13 korrikut, SPAK njoftoi ekzekutimin e vendimit për masat e sigurimit personal “arrest shtëpie” të caktuar ndaj ish-zv/ministres Voda dhe dy të hetuarave Majlinda Hasani dhe Florida Beu.
