Një anëtar i Agjencisë për Mbrojtjen e të Dhënave Personale paralajmëron se sipas masave të fundit shëndetësore, persona të paautorizuar mund të marrin të dhëna personale shëndetësore të qytetarëve, të cilat, sipas ligjit, kanë të drejtë t’i shohin vetëm mjekë të trajnuar.
Një anëtar i Këshillit të Malit të Zi të Agjencisë për Mbrojtjen e të Dhënave Personale, Muhamed Gjokaj, të mërkurën paralajmëroi se masat e reja kundër COVID-19 mund të vënë në rrezik të dhënat personale të qytetarëve.
Ai tha se druhej se persona të paautorizuar mund të marrin njohur mbi të dhënat personale të qytetarëve dhe i bëri thirrje Ministrisë së Shëndetësisë të ishte më e saktë në lidhje me masat e saj të reja shëndetësore.
“Ministria e Shëndetësisë duhet të shpjegojë në bazë të cilave norma ligjore specifike ka përcaktuar që kamerierët kanë të drejtë të përpunojnë të dhënat personale të qytetarëve që hyjnë në një kafene apo restorant.”
“Nëse nuk ka bazë ligjore të përshtatshme, qytetarët mund të padisin të gjitha ato subjekte që kërkojnë të inspektojnë të dhënat e tyre personale, të cilat lidhen edhe me informacionet shëndetësore”, tha Gjokaj për të përditshmen Pobjeda.
Më 30 korrik, Ministria e Shëndetësisë njoftoi se klientët e klubeve të natës, diskotekave dhe restoranteve duhet të tregojnë mjetet e tyre të identifikimit dhe Certifikatën kombëtare të COVID-19 para se të hyjnë në ambientet e brendshme.
Certifikata kombëtare e COVID-19 është një dokument i lëshuar nga Ministria e Shëndetësisë, i cili dëshmon se një person është vaksinuar, ose ka një test PCR negativ të kohëve të fundit, ose ka kaluar COVID-19. Sipas Ministrisë së Shëndetësisë, certifikata duhet t’i tregohet kamerierit ose stafit të klubit.
Ligji i Malit të Zi për Mbrojtjen e të Dhënave Personale specifikon që të dhënat personale që lidhen me kushtet shëndetësore mund të inspektohen vetëm nga personeli mjekësor. Ai ndalon inspektimin e të dhënave personale nga personel i paautorizuar.
Më 30 korrik, kreu i Drejtorisë Digjitale të Shëndetit, Aleksandar Sekulic, tha nën këto masa nuk po ndodhte asnjë shkelje e të dhënave personale të qytetarëve, pasi në Certifikatën e COVID-19 ishin të shënuara vetëm emri dhe data e lindjes së personit.
“Ne nuk zbulojmë të dhëna shëndetësore përmes certifikatave, por vetëm të dhënat që qytetarët duan të japin. Ata ranë dakord vullnetarisht të japin një sasi të caktuar të dhënash”, tha Sekulic në një konferencë për shtyp.
Më 3 gusht, një juriste, Andrijana Razic pretendoi se Ministria e Shëndetësisë kishte shkelur ligjin me masat e reja shëndetësore, duke e akuzuar atë se i kishte detyruar qytetarët të vaksinoheshin. Ajo tha se qytetarët e pa vaksinuar nuk duhet të diskriminohen në asnjë mënyrë.
“Është plotësisht e qartë se punonjësit në një restorant apo klub nate nuk kanë absolutisht të drejtë të identifikojnë qytetarët, ose t’u kërkojnë informacione shëndetësore që janë sekret me ligj. Qeveria duhet të marrë parasysh seriozisht pasojat e mundshme të ndjekjes së një politike të tillë diskriminuese dhe të rrezikshme shëndetësore, bazuar në një shkelje drastike të të drejtave themelore të njeriut”, tha Razic për gazetën e përditshme Dan.
Sipas Institutit të Shëndetit Publik, në vend janë 1,667 raste të regjistruara aktive me COVID-19. Kryeqyteti Podgorica dhe qyteti bregdetar i Budvës kanë numrin më të madh të rasteve. Të mërkurën, Ministria e Shëndetësisë tha se 34.5 për qind e popullsisë së rritur ishin vaksinuar kundër COVID-19.
